Дар Суғд беш аз 68 ҳазору 888 тонна пахта ҷамъоварӣ гардид

ДУШАНБЕ,  13.10.2020.  /АМИТ Ховар/. Имсол деҳқонони вилояти Суғд дар 58 177 гектар чигит корида, азм доранд аз он беш аз 129 ҳазору 500 тонна ҳосили хушсифат ҷамъоварӣ намоянд. Дар вилоят то ба имрӯз 68 ҳазору 888,9 тонна дурри гаронбаҳо ҷамъоварӣ гардидааст, ки он ба 53,2 %-и нақшаи дурнамо  баробар аст. 

Тавре ҷонишини сардори Сарраёсати кишоварзии вилояти Суғд Рустам Ҷалолов ба мухбири АМИТ «Ховар»  Абдуаҳад Дадобоев хабар дод, холо дар майдонҳои пахтазори вилояти Суғд чиниши пахта бомаром ҷараён дорад.

Аз ҷумла, то 12 октябр дар шаҳри Конибодом ба андозаи 66,2% (8803,0 тонна), ноҳияҳои Мастчоҳ – 61,1% (16760,1 т.), Спитамен – 57,0% (7469,8 т.), Ҷ.Расулов — 56,5% (6910,0 т.), Б.Ғафуров – 48,9% (8895,0 т.), Зафаробод – 44,8% (13412,0 т.) ва Ашт – 43,4% (6639,0 тонна) ҳосил ба нуқтаҳои пахтақабулкунӣ супорида шудааст.

Дар мавсими имсолаи ҷамъоварии «тиллои сафед» дар қаламрави вилоят 42 корхонаи коркарди пахта фаъолият доранд.

Баҳри сари вақт ҷамъоварӣ намудани ҳосили пахта имрӯзҳо дар майдонҳои ҳафт ноҳияи пахтакори вилоят беш аз 60 ҳазор саҳмдорону ёрдамчиён, намояндагони ташкилоту идораву муассисаҳои гуногун аз шаҳру ноҳияҳои вилоят ба кумаки пахтакорон баромадаанд, ки ҳамарӯза то 2,5 ҳазор тонна «тиллои сафед» ҷамъоварӣ менамоянд.

Акс аз манбаъҳои боз