Дар Тоҷикистон дар бахши саноати сабук беш аз 20 корхонаю коргоҳ таъсис ёфтанд

ДУШАНБЕ, 29.10.2020 /АМИТ «Ховар»/. Дар бахши саноати сабук соли равон дар ҷумҳурӣ 26 корхонаю коргоҳи нав ба истифода дода шуданд, ки тавассути онҳо беш аз 490 нафар шаҳрвандон бо ҷойи кор  таъмин гардиданд.

Дар ин хусус Вазорати саноат ва технологияҳои нави ҷумҳурӣ иттилоъ медиҳад.

Соли 2020 дар мамлакат корхонаҳои саноатии «Ваҳдат Текстайл» бо иқтидори солонаи истеҳсоли 19,2 миллион ҷуфт ҷӯробҳои гуногун дар шаҳри Душанбе, марҳилаи дуюми ҶДММ «Фарм Текс» бо иқтидори солонаи истеҳсоли 5 миллион дона докаи тиббӣ дар ноҳияи Данғара, ҶДММ «Тоҷтекс» бо иқтидори 20 ҳазор дона маҳсулоти дӯзандагӣ дар як шабонарӯз дар шаҳри Душанбе, инчунин коргоҳҳои дӯзандагӣ дар заминаи ҶДММ «Сано» ва ҶДММ «Нассоҷи Хуҷанд» дар шаҳри Хуҷанд, дар шаҳрҳои Хоруғ ва  Ҳисор, ноҳияи Шаҳринав ва коргоҳи истеҳсоли мебел дар ноҳияи Шаҳринав расман ба фаъолият оғоз намуданд.

Самти фаъолияти корхонаю коргоҳҳои навтаъсис ба коркарди пахта, истеҳсоли маҳсулоти дӯзандагӣ, ҷӯробҳо, халтаҳои полипропиленӣ, пахтаи кӯрпабоб, пойафзол ва мебел равона гардидааст. Ҳамзамон бо мақсади васеъ гардонидани фондҳои истеҳсолӣ, татбиқи раванди инноватсионӣ ва беҳтар гардонидани сифати маҳсулот дар корхонаҳои соҳаи саноати сабук  давоми нуҳ моҳи имсол ба маблағи 85,0 миллион сомонӣ дастгоҳу таҷҳизоти истеҳсолӣ, аз қабили дастгоҳҳои қолинбофӣ, кешбофӣ, бофандагӣ, халтабарорӣ ва дӯзандагӣ аз кишварҳои Россия, Чин, Туркия, Австрия, Эрон ва Корея ворид ва васлу насб карда шуданд.

Таъсиси 26 корхонаю коргоҳи нав дар соҳаи саноати сабук дар ҷумҳурӣ дар ҳолест, ки аз ҷониби Ҳукумати Ҷумҳурии Тоҷикистон саноатикунонии мамлакат ҳадафи чоруми  стратегӣ эълон гардидааст.