COVID-19. Дар Хуҷанд корҳои безараргардонӣ гузаронида мешаванд

ДУШАНБЕ, 09.11.2020 /АМИТ «Ховар»/. Бо мақсади пешгирӣ аз бемориҳои сироятӣ ва таъмини солимии сокинон дар шаҳри Хуҷанд ҳамарӯза тадбирҳои безараргардонии сартосарӣ гузаронида мешаванд.

Тавре аз маркази матбуоти Раиси шаҳри Хуҷанд ба АМИТ «Ховар» иттилоъ доданд, корҳои безараргардонӣ аз ҷониби сохторҳои марбутаи Мақомоти иҷроияи ҳокимияти давлатии шаҳри Хуҷанд  тибқи дастуру супоришҳои раисони ситодҳои вилоятӣ ва шаҳрӣ оид ба пешгирӣ аз паҳншавии бемории коронавирус Covid-19 роҳандозӣ шудаанд.

Ин навбат корҳои безараргардонӣ дар бозорҳои марказии «Панҷшанбе» ва «Афросиёб» бо ҷалби кормандони воҳидҳои махсуси хадамоти оташнишонӣ, Маркази назорати давлатии санитарию эпидмологии шаҳру вилоят ва дигар сохторҳои шаҳрдорӣ бо сафарбаркунии мошинҳои махсус ва дастгоҳҳои безараргардонӣ сурат гирифтанд.

Инчунин корҳои безараргардонӣ дар маҳаллаи «Бофанда»-и шаҳри Хуҷанд, ҷойҳои серодам, кӯчаву хиёбон, мавзеъҳои фароғатӣ ва истгоҳҳои нақлиётӣ ба роҳ монда шуданд.

Бо вуҷуди андешидани тадбирҳои пешгирӣ ва роҳандозии корҳои тарғиботиву ташвиқотӣ риоя нагардидани тавсияҳои Созмони умумиҷаҳонии тандурустӣ ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз ҷониби шаҳрвандон ва марказҳои савдою хизматрасонӣ ба чашм мерасад, ки ин сабаби нигаронист.