Филми тоҷикии «Ношунаво» барандаи ҷоизаи Кинофестивали Осиё гардид

Ноябрь 11, 2020 13:07

ДУШАНБЕ, 11.11.2020 /АМИТ «Ховар»/.  Филми коргардони ҷавони тоҷик Усмон Юсупов таҳти унвони «Ношунаво» дар Чин сазовори ҷоизаи мӯътабар гардид. Тавре АМИТ «Ховар» хабар медиҳад, дар ин бора Сафорати Ҷумҳурии Тоҷикистон дар Ҷумҳурии Мардумии Чин иттилоъ додааст.

Филм сазовори ҷоизаи байналмилалии синамоии  Golden Begonia Award («Олиҳаи тиллоӣ») -и Фестивали VIII Осиёии филмҳои кӯтоҳметраж дар Чин дониста шуд.

Мунаққидон ин филмро яке аз беҳтаринҳо дар кинофестивал арзёбӣ кардаанд.

Ҳангоми мукофотонидани ширкаткунандагони озмун ҷоизаи Усмон Юсупов барои филм аллакай ба намояндаи Сафорати Тоҷикистон дар Чин тақдим шуда буд, зеро худи муаллиф бо сабаби пандемия ба ин фестивал омада натавонист.

Тибқи иттилои сафорат, маросими супоридани ҷоизаҳо дар шаҳри Линсанги вилояти Юннан дар ҷанубу ғарби Чин баргузор шудааст.

ДАР АКС: Супоридани ҷоиза ба намояндаи Сафорати Ҷумҳурии Тоҷикистон дар ҶМЧ Муҳаммад Эгамзод. Акси сафорати Тоҷикистон дар Чин

Гуфта мешавад, ки дар кинофестивал ҳамагӣ се филми коргардонҳои тоҷик муаррифӣ шуда, озмун ҳамасола маҷмӯан беш аз 20 ҳазор дархостро аз 30 кишвари ҷаҳон интихоб мекунад.

Ёдовар мешавем, ки дар 7-умин Фестивали осиёии филмҳои кӯтоҳметраж (7thAsian MicroFilmArtFestival), ки моҳи ноябри соли 2019 дар Чин баргузор шуда буд, филми тоҷикии «Хаёлфурӯш» -и коргардон Шарофат Арабова низ ҳамчун яке аз беҳтарин филмҳои кинофестивал бо ҷоизаи «Олиҳаи тиллоӣ» (Begonia Golden) мукофотонида шуда буд. Филми «Хаёлфурӯш» дар ҳамкорӣ бо Корхонаи воҳиди давлатии «Тоҷикфилм» ва студияи ҳиндустонии «Марудҳар Артс» таҳия шуда, барои бозидани нақши асосӣ ҳунарпешаи кинои Ҳиндустон Пушпендра Сингх даъват шуда буд. Филм бо забонҳои тоҷикӣ ва ҳиндӣ ба навор гирифта шудааст.

Ноябрь 11, 2020 13:07

Хабарҳои дигари ин бахш

Дар Тоҷикистон Рӯзҳои фарҳанги Туркманистон баргузор мегарданд
ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус