Вазири корҳои хориҷии Тоҷикистон бо Вазири корҳои хориҷии Испания гуфтугӯи телефонӣ анҷом дод

ДУШАНБЕ, 06.11.2020 /АМИТ «Ховар»/. 5 ноябр гуфтугӯи телефонии Вазири корҳои хориҷии Ҷумҳурии Тоҷикистон Сироҷиддин Муҳриддин бо Вазири корҳои хориҷӣ, Иттиҳоди Аврупо ва ҳамкории Подшоҳии Испания хонум Аранча Гонсалес Лайя баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Ҳамкории ду кишвар дар чаҳорчӯби созмонҳои байналмилалӣ яке аз мавзӯъҳои асосии суҳбат буда, ҷонибҳо зарурати тавсеаи муносибатҳоро таъкид карданд. Дар ин партав шарокат ва ҳамёрӣ муҳим дониста шуд.

Мусоҳибон инчунин ҳолати кунунӣ ва дурнамои робитаҳои дуҷонибаи Тоҷикистону Испанияро дар соҳаҳои мухталиф баррасӣ карданд. Рағбати тарафайн ба таҳкими бештари ҳамкории мутақобилан судманд дар соҳаҳои сиёсӣ, иқтисодӣ, фарҳангӣ ва гуманитарӣ, инчунин дар чаҳорчӯбаи Иттиҳоди Аврупо баён гардид.

Вазирон перомуни тадбирҳои пешгирии интишори СOVID-19 дар кишварҳои ҳамдигар мубодилаи афкор карда, бори дигар пойбандии худро ба муборизаи муштарак бо ҳамагирӣ ва паёмадҳои он изҳор намуданд.

АКС аз ВКХ ҶТ