Ҳайати Тоҷикистон дар вохӯрии муовинони вазирони корҳои хориҷии кишварҳои Осиёи Марказӣ ва Афғонистон ширкат кард

ДУШАНБЕ, 11.12.2020 /АМИТ «Ховар»/. 10 декабр муовини Вазири корҳои хориҷии Ҷумҳурии Тоҷикистон Музаффар Ҳусейнзода дар вохӯрии 10-уми муовинони вазирони корҳои хориҷии кишварҳои Осиёи Марказӣ ва Афғонистон, ки бо ташаббуси Ҳукумати Ҷумҳурии Қазоқистон ва Маркази минтақавии СММ оид ба дипломатияи боздоранда барои Осиёи Марказӣ (UNRCCA) дар шакли видеоконфронс танзим гардид, иштирок ва суханронӣ намуд.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, дар ин мулоқот ҷонибҳо роҷеъ ба ҳамкории густурда ва босамари кишварҳои минтақа, аз ҷумла дар доираи UNRCCA, инчунин самтҳои мубрам ва авлавиятноки талошҳои муштарак, ки барои таҳкими амният ва рушди устувори Осиёи Марказӣ равона шудаанд, табодули назар карданд.