Ҷаласаи Кумитаи роҳбарикунандаи МБС бо иштироки Вазорати рушди иқтисод ва савдои Тоҷикистон

ДУШАНБЕ, 04.12.2020/АМИТ «Ховар»/. Дар ҷаласаи Кумитаи роҳбарикунандаи Маркази байналмилалии савдо (МБС), ки дар формати видеоӣ бо иштироки муовини Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода доир гардид, дастовардҳои мамлакат дар доираи фаъолияти Кумитаи ҳамоҳангсоз оид ба содагардонии расмиёти савдо ва раванди татбиқи Барномаи ҷаҳонии нассоҷӣ ва дӯзандагӣ (GTEX) мавриди баррасӣ қарор гирифтанд.

Дар ин бора мухбири АМИТ “Ховар” бо истинод ба Вазорати рушди иқтисод ва савдои Ҷумҳурии Тоҷикистон иттилоъ медиҳад.

Абдураҳмон Абдураҳмонзода вобаста ба ҳамкории мутақобилан судманд бо Ҳукумати Конфедератсияи Швейтсария ва Маркази байналмилалии савдо дар самти фаъолияти Кумитаи ҳамоҳангсоз оид ба содагардонии расмиёти савдо, таъсиси Портали савдои Тоҷикистон, бартараф намудани таъсири манфии бемории сироятии COVID-19 ба савдо, тақвияти рушди содирот, тезонидани ҷараёни диверсификатсияи истеҳсолоти ба содирот нигаронидашуда сухан карда, омодагии густариши ҳамкориро дар самтҳои зикршуда иброз намуд.

Намояндагони созмонҳои байналмилалӣ ҳамкориро бо Ҷумҳурии Тоҷикистон баланд арзёбӣ намуда, умедвории худро ҷиҳати ба роҳ мондани муносибатҳои дуҷонибаи бештар баён намуданд.

Тибқи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти содагардонии расмиёти савдо як қатор корҳо ба анҷом расонида шудаанд. Аз ҷумла, бо қарори Ҳукумати Ҷумҳурии Тоҷикистон аз 24 декабри соли 2016 Кумитаи ҳамоҳангсоз оид ба содагардонии расмиёти савдо таъсис дода шуд, ки  намояндагони вазорату идораҳои дахлдор ва бахши хусусӣ аъзои он мебошанд. Инчунин ҷиҳати шаффоф гардонидани сиёсати савдои мамлакат Портали савдои Тоҷикистон муаррифӣ карда шуд, ки бо 3 забон маълумотро оид ба 53 расмиёти содиротӣ, воридотӣ ва транзитӣ (зиёда аз 1500 номгӯи маҳсулот) дар бар мегирад.