Дар Душанбе татбиқи «Стратегия оид ба ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024» -ро баррасӣ карданд

ДУШАНБЕ, 11.12.2020 /АМИТ «Ховар»/. Дар шаҳри Душанбе зимни ҷаласаи Комиссияи байниидоравӣ аз ҷумлаи намояндагони вазорату идораҳои дахлдор татбиқи «Стратегия оид ба  ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024»-ро баррасӣ карданд, хабар медиҳад маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон.

Дар ҷаласа сардори Раёсати амнияти санитарӣ-эпидемиологӣ, ҳолатҳои фавқулода ва ёрии таъҷилии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Наврӯз Ҷаъфаров дар бораи моҳият ва зарурати татбиқи стратегияи ғизои солим ва фаъолияти ҷисмонӣ дар Тоҷикистон изҳори андеша кард. Ба қавли ӯ, норасоии ғизои солим яке аз мушкилоти умдаи умумиҷаҳонӣ дар соҳаи тандурустӣ мебошад.

Ғизои ғайри солим ва сатҳи пасти фаъолияти ҷисмонии кӯдакон ва калонсолон метавонад барои саломатӣ ва некӯаҳволии онҳо, инчунин сармояи инсонӣ ва рушди кишвар пайомадҳои манфӣ дошта бошад.

«Қобили зикр  аст, ки норасоии микроэлементҳои серғизо сабаби пайдоиши бисёр бемориҳое мешавад, ки пайомадҳои номатлуб доранд. Аз  ҷумла, намуди бештар паҳншудаи  норасоии микроэлементҳои серғизо камхунӣ мебошад, ки асосан бо камбуди  оҳан вобаста аст ва хавфи таваллуди кӯдаконро бо вазни кам зиёд мекунад, инчунин инкишофи ҷисмониро суст намуда,  метавонад ҳангоми таваллуд  сабаби  фавтидани 19% кӯдакон гардад», — илова намуд ӯ.

Зикр гардид, ки бо дарназардошти аҳамияти ин масъала, таъмини амнияти озуқаворӣ яке аз афзалиятҳо ва ҳадафҳои стратегии Ҳукумати Ҷумҳурии Тоҷикистон мебошад.