Дар Кумитаи рушди маҳал ҳолат ва дурнамои рушди иҷтимоию иқтисодии вилоятҳо ва шаҳру ноҳияҳо баррасӣ шуд

ДУШАНБЕ, 5.12.2020 /АМИТ «Ховар»/. «Ҳолат ва дурнамои рушди иҷтимоию иқтисодии вилоятҳо ва шаҳру ноҳияҳои Ҷумҳурии Тоҷикистон»-таҳти ин унвон 4 декабр бо ташаббуси Кумитаи рушди маҳали назди Президенти Ҷумҳурии Тоҷикистон дар ҳамкорӣ бо Институти иқтисодиёт ва демографияи Академияи миллии илмҳои  Тоҷикистон суҳбати “мизи мудаввар” баргузор гардид. Дар кори он  олимону мутахассисон фаъолона иштирок намуданд.

Тавре аз Кумитаи рушди маҳал ба АМИТ «Ховар» хабар доданд,   дар ҳамоиш  масъалаҳои ҳамкорӣ, роҳҳои ҳалли мушкилиҳои мавҷуда дар сатҳи маҳал ва дигар масъалаҳои муҳими иҷтимоию иқтисодие, ки ба рушди минтақаҳо равона гарида буданд, мавриди баррасӣ қарор гирифтанд.

Зимни ҳамоиши илмӣ ҳамчунин оид ба татбиқи қонунҳои Ҷумҳурии Тоҷикистон «Дар бораи мақомоти худидоракунии шаҳрак ва деҳот» ва «Мақомоти худфаъолияти ҷамъиятӣ» ибрози назар карда шуд.

Зикр шуд, ки 62 адад барномаҳои минтақавӣ оид ба рушди маҳал ва дигар масъалаҳои муҳими иҷтимоию иқтисодӣ дар соли 2020 ба итмом мерасанд. Айни замон аз ҷониби мақомоти иҷроияи ҳокимияти давлатӣ “Барномаи рушди иҷтимоию иқтисодӣ барои солҳои 2021 – 2025” мавриди таҳия ва тасдиқ қарор дорад.