Китобхонаи марказии шаҳри Гулистон соҳиби шоҳҷоизаи озмуни вилоятӣ гардид

ДУШАНБЕ, 30.12.2020 /АМИТ «Ховар»/.  Дар озмуни «Китобхонаи намунавии вилояти Суғд дар соли 2020»  Китобхонаи марказии шаҳри Гулистон соҳиби шоҳҷоиза ва 12 ҳазор сомонӣ гардид.  Китобхонаи марказии ноҳияи Айнӣ бо дипломи дараҷаи якум — 10 ҳазор сомонӣ, Китобхонаи деҳаи Дашти деҳоти Иван-тоҷики ноҳияи Кӯҳистони Мастчоҳ бо дипломи дараҷаи ду — 8 ҳазор сомонӣ ва Китобхонаи марказии шаҳри  Конибодом бо дипломи дараҷаи 3 — 6 ҳазор сомонӣ қадрдонӣ шуданд.

Тавре аз хадамоти матбуоти Раиси вилояти Суғд ба АМИТ «Ховар» иттилоъ доданд, мақсад аз роҳандозӣ намудани озмуни мазкур — ин дуруст ба роҳ мондани фаъолияти  китобхонаҳои марказӣ, китобхона-филиалҳо, омӯзиши ҳолати нигаҳдории махзан, истифодаи босамари китобҳо, баланд бардоштани дараҷаи тахассуси китобдорон дар раванди фаъолият, беҳдошти маҳорати касбии китобдорону китобшиносон ва  муайян кардани сатҳи хизматрасонии китобиву иттилоотӣ мебошад.

Ёдовар мешавем, ки  дар вилояти Суғд аз соли 2018 озмуни «Китобхонаи намунавии вилояти Суғд»  гузаронида шуда, дар он китобхонаҳои шаҳру ноҳияҳои вилоят пайваста иштирок менамоянд.