«Оила бе хушунат зебост» — таҳти чунин унвон дар ноҳияи Ҷаббор Расулов машварат доир гардид

ДУШАНБЕ, 07.12.2020 /АМИТ «Ховар»/. Бо мақсади иҷрои «Барномаи давлатии пешгирии зӯроварӣ дар оила дар Ҷумҳурии Тоҷикистон барои солҳои 2014-2023» ва  баланд бардоштани маърифати ҳуқуқии шаҳрвандон бахши  кор бо занон ва оилаи мақомоти иҷроияи ҳокимияти давлатии ноҳияи Ҷаббор Расулов таҳти унвони «Оила бе хушунат зебост» машварат баргузор намуд. Дар ин бора аз Кумитаи кор бо занон ва оилаи назди Ҳукумати Ҷумҳурии Тоҷикистон ба АМИТ «Ховар» хабар доданд.

Дар машварат мудирони кор бо занон, Сабти асноди ҳолати шаҳрвандӣ, маорифу тандурустӣ, раисони шӯрои занони ҷамоатҳо, иштирок намуда, назарҳояшонро вобаста ба пешгирии хушунати хонаводагӣ баён доштанд. Зимни машварат аз тарафи намояндаи Ташкилоти ҷамъиятии Маркази иҷтимоии ҳуқуқии «Сарчашма» ба иштирокчиён варақаҳои иттилоотӣ тақсим карда шуданд.

Ҳамзамон аз ҷониби бахши кор бо занон «Микрофони озод» ташкил карда шуда, сокинон фикру ақида ва пешниҳодҳои худро оид ба пешгирии зӯроварӣ дар оила  иброз намуданд.

Дар робита ба ин мавзӯъ аз ҷониби шуъбаи кор бо занон ва оилаи мақомоти иҷроияи ҳокимияти давлатии шаҳрҳои Исфара ва Конибодом таҳти унвони «Нест бод зӯроварӣ» барномаҳои иттилоотӣ баргузор гардиданд.