Раиси Шӯрои олии мусолиҳаи миллии Афғонистон Абдуллоҳ Абдуллоҳ ба Душанбе омад

ДУШАНБЕ, 21.12.2020 /АМИТ «Ховар»/. Ҳайати баландпояи Афғонистон бо роҳбарии Раиси Шӯрои олии мусолиҳаи миллии Афғонистон Абдуллоҳ Абдуллоҳ ба Душанбе омад. Субҳи имрӯз дар Фурудгоҳи байналмилалии Душанбе меҳмони олиқадрро Вазири нақлиёти Ҷумҳурии Тоҷикистон Азим Иброҳим ва дигар шахсони расмӣ истиқбол гирифтанд, хабар медиҳад АМИТ «Ховар».

Сафари ҳайати ҳукумати Афғонистон ба Душанбе ду рӯз идома хоҳад кард. Ҳайатҳои ду давлат таъсиси лоиҳаи дипломатии муштаракро барои таъмини раванди сулҳ дар минтақа баррасӣ мекунанд.

Тавре аз Вазорати корҳои хориҷии Тоҷикистон ба АМИТ «Ховар» иттилоъ доданд, имрӯз мулоқоти Абдуллоҳ Абдуллоҳ бо Раиси Маҷлиси намояндагони Маҷлиси Олӣ Мамадтоҳир Зокирзода, Сарвазири Ҷумҳурии Тоҷикистон Коҳир Расулзода ва Вазири корҳои хориҷии Тоҷикистон Сироҷиддин Муҳриддин ба нақша гирифта шудааст.

Фардо Раиси Шӯрои олии мусолиҳаи миллии Афғонистонро Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ҳузур мепазиранд.

Қаблан АМИТ «Ховар» бо истинод ба Вазорати корҳои хориҷии Тоҷикистон дар бораи мулоқоти Сафири Фавқулода ва Мухтори Тоҷикистон дар Ҷумҳурии Исломии Афғонистон Саъдӣ Шарифӣ бо Абдуллоҳ Абдуллоҳ, ки 16 декабр дар Кобул баргузор шуд, хабар дода буд. Зимни мулоқот мавзӯъҳои сафари қарибулвуқӯи Раиси Шӯрои олии мусолиҳаи миллии Афғонистон ба Тоҷикистон ва ҳамкории минбаъдаи ду кишвар баррасӣ шуданд.

Зимни мулоқот Абдуллоҳ Абдуллоҳ Тоҷикистонро ҳамсояи нек, дӯсту бародар ва кишвари барои Афғонистон муҳим арзёбӣ намуда, изҳори умедворӣ кард, ки сафари ӯ ва ҳайати ҳамроҳаш ба Тоҷикистон бо дастовардҳои чашмрасе барои ду давлат анҷом меёбад.

Акси аввал аз бойгонӣ