Раёсати «Тоҷикстандарт» дар Бадахшон соҳиби таҷҳизоти муосири ташхиси маҳсулоти ғизоӣ гардид

ХОРУҒ, 10.12.2020 /«Ховар»/. Мутахассисони Раёсати «Тоҷикистандарт» дар Вилояти Мухтори Кӯҳистони Бадахшон минбаъд дар муддати кӯтоҳ ва бидуни иштибоҳ сифати маҳсулоти хӯрокиро муайян мекунанд.

Тавре мухбири минтақавии АМИТ “Ховар” иттилоъ медиҳад, дар гузашта бо сабаби кӯҳна ва кам будани асбобу анҷоми озмоишгоҳ  ҳам муҳлати ташхиси маҳсулот ба таъхир меафтод ва ҳам ба таври дақиқ муайян кардани сифати он душвор буд.

Ба гуфтаи муовини сардори раёсати мазкур Гулмамад Гулмамадов, “таҷҳизоти рақамӣ ба мутахассисони соҳа имкон медиҳад, ки онҳо ҷузъитарин нуқсонро дар таркиби маҳсулоти ширӣ, спиртӣ, қаннодӣ ва меваҷоту сабзавот муайян намоянд. Дар бозори марказӣ бештари маҳсулоти шириро ҳанӯз ҳам дар зарфҳои полимерӣ ё пластикии истифодашуда ба фурӯш мегузоранд, ки  мутобиқи талаботи Регламенти техникии «Бехатарии борҷома» истифодаи дубораи зарфҳои полимерӣ қатъиян манъ аст. Чунин зарфҳо танҳо барои нӯшокиҳои хунук ва равғанҳои растанӣ пешбинӣ шудаанд. Ҳангоми мулоқот мутахассисони «Тоҷикстандарт» ба фурӯшандагони маҳсулоти ширӣ тавсия доданд, ки минбаъд  танҳо аз борҷомаҳои шишагин ва ё металлии сирдор истифода баранд”.

Мудири озмоишгоҳи маҳсулоти хӯрокии Раёсати мазкур Ҷамила Маликова гуфт, ки “дар даҳ моҳи соли равон  887 намунаи маҳсулоти ширӣ ва кишоварзӣ барои ташхис ба озмоишгоҳ оварда шуд. Ташхис нишон дод, ки 279 намуди ин маҳсулот ғайристандартӣ буда, саломатии инсонро ба хатар мувоҷеҳ месозанд. Аз ин рӯ дар асоси комиссияи муштараки ниҳодҳои назоратӣ он нобуд карда шуд. Аз 4 ҳазору 576 килограмми маҳсулоти хӯрокӣ 935 килои он сабзавоту зироат мебошад”.

Мудири озмоишгоҳи мазкур гуфт, ки баъди дастрас гардидани таҷҳизоти рақамӣ фаъолияти онҳо дар самти ошкор кардани маҳсулоти хӯрокӣ дар дӯкону мағозаҳои шаҳр ва бозори марказӣ  самараи бештар медиҳад.