Дар ҳашари умумишаҳрӣ дар Истаравшан 7,6 тонна партов берун бароварда шуд

ДУШАНБЕ, 21.01.2021 /АМИТ «Ховар»/. Бо мақсади ободонию бунёдкорӣ ба истиқболи сазовори  ҷашни 30-солагии Истиқлоли давлатии Ҷумҳурии Тоҷикистон сокинони шаҳри бостонии Истаравшан бо истифода аз боду ҳавои мусоиди моҳи январ ба ҳашари  умумишаҳрӣ баромаданд.

Дар натиҷа 1,3 километр ҷӯйбори обгузари ду тарафи хиёбонҳои Исмоили Сомонӣ ва Истиқлоли шаҳр, майдони марказӣ, ҳудуд ва атрофи биноҳои маъмурии корхонаҳои шафати роҳи асосӣ тоза ва рӯбучин гардида, 7,6 тонна поруву хокрӯбаҳо ба партовгоҳи шаҳрӣ бароварда шуданд.

Дар ин хусус Кумитаи ҳифзи муҳити зисти назди Ҳукумати ҷумҳурӣ иттилоъ медиҳад.

Дар ҳашари умумишаҳрӣ беш аз 500 нафар кормандони корхонаву ташкилот, муассисаҳои таълимӣ, аз ҷумла Коллеҷи тиббӣ, Литсейи касбии техникии №14, Коллеҷи ҳунарҳои мардумӣ, беморхонаҳои марказию хусусӣ, кумитаи маҳаллаҳо, ҷамоати шаҳраку деҳот ва соҳибкорон иштирок карданд.