Дар Гулистон дар соҳили обанбори «Баҳри Тоҷик» ва шафати роҳҳо 1000 бех ниҳоли олуча шинонида шуд

ДУШАНБЕ, 22.01.2021. /АМИТ “Ховар”/. Бахшида ба ҷашни 30-солагии Истиқлоли давлатии Ҷумҳурии Тоҷикистон дар шаҳри Гулистони вилояти Суғд ҳашари сабзазоркунию ободонӣ ва маъракаи ниҳолшинонӣ баргузор гардид. Зимни ҳашар 1000 бех ниҳоли дарахтони мевадиҳандаи навъи олуча дар масофаи зиёда аз 1 километр қад-қади роҳҳо ва дар лаби соҳили обанбори «Баҳри Тоҷик» шинонида шуд.

Тавре аз Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ “Ховар” иттилоъ доданд, дар ҷараёни ҳашари мазкур кормандони сохторҳои мақомоти иҷроияи ҳокимияти давлатии шаҳр, муассисаҳои хоҷагии коммуналӣ, корхонаву ташкилот ва муассисаҳои таълимӣ фаъолона иштирок намуда, минтақаҳои назди ҶСК «Қолинҳои Қайроққум», шафати роҳи назди боғ ва ҳудуди боғи Ғалаба, осоишгоҳ ва кӯчаҳои маркази шаҳрро аз партовҳои пластикӣ ва дигар намуди партовҳо тоза намуданд.

Давоми мавсими сабзазоркунию ободонӣ шинонидани ниҳолҳои дарахтони сояафкану ороишӣ, гулҳои мавсимӣ дар боғи Ғалаба ва дигар минтақаҳои шаҳр пешбинӣ гардидааст.
Дар ҳашари мазкур 400 нафар намояндагони корхонаҳо ва 200 нафар омӯзгорону хонандагони муассисаҳои таҳсилоти миёнаи умумии шаҳр ширкат варзиданд.