Дар Панҷакент ҷашни миллии Сада бошукуҳ таҷлил гардид

ДУШАНБЕ, 31.01.2021. /АМИТ «Ховар»/. Сокинони шаҳру деҳоти Панҷакент ҷашни миллии Садаро бошукуҳ таҷлил намуданд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент иттилоъ медиҳад, дар чорабинии идона маҳсулоти кишоварзии хоҷагиҳои деҳқонӣ, маҳсулоти саноатӣ ва ҳунарҳои мардумӣ, аз қабили зардӯзӣ, бофтани атласу адрас ба намоиш гузошта шуд.

Яке аз рамзҳои асосии ин ҷашн – афрӯхтани гулхан аст, ки сокинони шаҳру деҳоти Панҷакент дар ин чорабинӣ дар гирди гулхан шодию нишот карда, бо шукргузорӣ аз даврони соҳибистиқлолӣ мероси қадимаи ниёгони худро эҳё ва ба намоиш доданд.

Иҷрокунандаи вазифаи раиси шаҳри Панҷакент Холиқзода Абдухолиқ дар ҷашни Сада иштирок намуда, иброз намуд, ки бо шарофати Истиқлоли давлатӣ ва сиёсати бобарори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон урфу одатҳои ниёгон, анъанаву суннатҳои таърихии миллатамон, ба мисли ҷашнҳои Наврӯз, Сада, Меҳргон ва Тиргон аз нав эҳё гардиданд, ки метавонанд дар муаррифии миллати мо дар арсаи байналмилалӣ саҳми муассир гузоранд.

Дар маросими таҷлили ҷашни Сада аз ҷониби Мақомоти иҷроияи ҳокимияти давлатии шаҳри Панҷакент ба фаъолон туҳфаҳо тақдим гардид.