Тоҷикистон соли 2020 ба кишварҳои хориҷӣ 3,3 ҳазор тонна ангишт содирот намудааст

ДУШАНБЕ, 29.01.2021 /АМИТ «Ховар»/. Тоҷикистон соли 2020 ба кишварҳои ҳамҷавор, назири Афғонистон, Ӯзбекистон ва инчунин Покистон дар маҷмӯъ дар ҳаҷми 3,3 ҳазор тонна ангишт содирот  намудааст, ки нисбат ба соли 2019  14,3 ҳазор тонна  кам мебошад.

Тибқи хабари ба АМИТ «Ховар» расидаи Вазорати саноат ва технологияҳои нави ҷумҳурӣ, содироти ангишт ба кишварҳои хориҷӣ аз ҷониби  корхонаҳои «Комбинати металлургии Тоҷик» ва «Талко Ресурс» сурат гирифтааст. Аз ҳаҷми умумии ангишти ба хориҷа содиротшуда  1,3 ҳазор тонна ба Покистон,  1,2 ҳазор тонна ба Афғонистон  ва 0,8 ҳазор тонна ба Ӯзбекистон интиқол дода шудааст.

Омилҳои асосии коҳиш ёфтани ҳаҷми содироти ангишт  ба кишварҳои хориҷӣ ба зуҳур ва паҳн гардидани бемории сироятии СОVID-19 рабт дода мешаванд, зеро бар асари ин пандемияи ҳамагир иртибот миёни кишварҳои минтақа муваққатан қатъ гардида буд.