Вазорати сохтмони Россия механизми вуруди муҳоҷирон аз Тоҷикистон, дигар кишварҳои ИДМ ва Туркияро таҳия намуд

ДУШАНБЕ, 23.01.2021 /АМИТ «Ховар»/. Механизми вуруди муҳоҷирон аз Тоҷикистон, Ӯзбекистон, Қазоқистон ва Туркия барои кор дар сохтмонҳои Россия муқаррар шуда, он ба таври «дастӣ»*  идора карда ммешавад. Тибқи иттилои АМИТ «Ховар» бо истинод ба ТАСС, дирӯз, 22 январ Вазири сохтмон ва хоҷагии манзилию коммуналии Россия Ирек Файзуллин (ДАР АКС) дар мулоқот бо ҷомеаи тиҷоратӣ дар Палатаи савдо ва саноати кишвараш дар ин бора хабар дод.

«Комиссия барои Тоҷикистон, Ӯзбекистон, Қазоқистон ва Туркия таъсис дода шудааст. Мо ин тартибро (воридоти қувваи кории хориҷӣ ба Россия — тавзеҳи  АМИТ “Ховар”) тавассути идоракунии дастӣ роҳандозӣ намудем», — гуфт Файзуллин.

Ёдовар мешавем, қаблан Президенти Россия Владимир Путин ба Ҳукумати ин кишвар дастур дода буд, ки ҷалби муҳоҷирони меҳнатиро ба сохтмонҳо то 1 марти соли 2021 бо риояи талаботи санитарию эпидемиологӣ ба роҳ монад.

                                     АКС аз сомонаи cnis.ru

 _______________________________________________

*Идоракунии дастӣ – усули идоракуниест, ки шахси ҳуқуқӣ ва воқеии аз он истифодабаранда тамоми масъулияти иҷрои кореро ба зиммаи худ мегирад ва нисбат ба шахсони ҳуқуқӣ ва воқеии дигар ба таври алоҳида (инфиродӣ) кор мебарад – тавзеҳи АМИТ «Ховар».