ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар иншооти ба шарафи ҷашни миллӣ бунёдшавандаи Қубодиён 80 фоизи корҳо иҷро гардидаанд

ДУШАНБЕ, 01.02.2021 /АМИТ «Ховар»/. Бахшида ба ҷашни 30 – солагии Истиқлоли давлатии Ҷумҳурии Тоҷикистон дар ноҳияи Қубодиён бунёди иншооти ба шарафи ин ҷашни миллӣ бунёдшаванда бомаром идома дошта, дар 163 иншоот 80 фоизи корҳо иҷро гардидаанд. Дар ин бора АМИТ «Ховар» бо истинод ба мақомоти иҷроияи ҳокимияти давлатии ноҳияи Қубодиён иттилоъ медиҳад.

Иншооти сохташуда доир ба соҳаҳои гуногуни иҷтимою хизматрасонӣ, марказҳои саломатию бунгоҳҳои тиббӣ, майдончаҳои варзишӣ, муассисаҳои таълимию касбомӯзӣ ва дигар инфрасохтори зарурӣ буда, аз ҷониби мақомоти ҳокимияти давлатӣ, соҳибкорону саховатпешагон ва шахсони ватандӯсти мамлакат бунёд мегарданд.

Бино ба зикри масъулини соҳа, қисме аз ин иншооти ҷашнӣ дар арафаи Иди Наврӯзи байналмилалӣ, Рӯзи Ваҳдати миллӣ ва ҷашни 30-солагии Истқилоли давлатии Ҷумҳурии Тоҷикистон мавриди баҳрабардорӣ ва истифодаи умум қарор дода мешаванд.

Инчуни дар ноҳия барои васеъ намудани кишти такрорӣ, истифодаи босамари заминҳои наздиҳавлигӣ, заминҳои президентӣ ва хоҷагиҳои деҳқонӣ корҳои фаҳмондадиҳӣ ҷараён доранд.

Дар ноҳияи Қубодиён ба истеҳсолу парвариши меваю сабзавот, ғалладонагӣ, парвариши чорвои калону хурд, истифодаи самараноки заминҳои кишоварзӣ ва тақвияти корҳои саҳроӣ аҳамияти ҷиддӣ дода мешавад.

Вобаста ба ин масъулини соҳаро мебояд, ки баҳри вусъат бахшидани  корҳои кишоварзӣ дар мавсими тирамоҳ ва баҳор тадбирҳои зарурӣ андешанд.