ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкор Комилҷон Раҳмонов дар Вахш бо усули муосири меъморӣ майдончаи варзишӣ месозад

ДУШАНБЕ, 19.02.2021 /АМИТ «Ховар»/.  Ба муносибати ҷашни 30–солагии Истиқлоли давлатии Ҷумҳурии Тоҷикистон дар деҳаи Тепалиқи Ҷамоати шаҳраки Кирови ноҳияи Вахш аз ҷониби соҳибкор Комилҷон Раҳмонов майдончаи варзишӣ бо усули муосири меъморӣ ба истифода дода мешавад.

Тавре аз шуъбаи иттилоотию таҳлилии дастгоҳи раиси вилояти Хатлон ба АМИТ «Ховар» иттилоъ доданд, раиси вилояти Хатлон Қурбон Ҳакимзода зимни сафари корӣ аз ҷараёни сохтмони майдончаи варзишӣ боздид намуд.

Гуфта шуд, ки майдончаи варзишӣ дар асоси лоиҳа бо усули муосири меъморӣ дар масоҳати 800 метри мураббаъ сохта мешавад. Барои бунёди иншоот сарфи 280 000 сомонӣ пешбинӣ шудааст.

Дар майдончаи варзишӣ шароити хуби хизматрасонӣ фароҳам оварда мешавад. Баъди пурра ба кор оғоз намудани майдончаи варзишӣ бо фарогирии мураббиён ва ҷавонони шаҳраку деҳот 5 нафар бо ҷойи кори доимӣ таъмин мегарданд.

Раиси вилоят вобаста ба болопӯш кардани майдонча ва ободонии атрофи он ба масъулин тавсияҳо дод.