Ҷамолиддин Нуралиев дипломати британиягиро бо вазъи макроиқтисодӣ ва низоми бонкии Тоҷикистон шинос намуд

ДУШАНБЕ, 17.02.2021 /АМИТ «Ховар»/. Масоили ҳамкории дуҷониба дар доираи барномаҳои нав дар мулоқоти муовини якуми Раиси Бонки миллии Тоҷикистон Ҷамолиддин Нуралиев бо Сафири Шоҳигарии Британияи Кабир ва Ирландияи Шимолӣ Мэттю Лоусон  ва роҳбари Дафтари Департаменти рушди байналмилалии Британияи Кабир хонум Ҳонор Фланаган мавриди баррасӣ қарор дода  шуд, иттилоъ медиҳад АМИТ “Ховар” бо истинод ба Бонки миллии Тоҷикистон.

Муовини якуми Раиси Бонки миллии Тоҷикистон Ҷамолиддин Нуралиев дар мулоқот аз робитаҳои дӯстонаи Ҷумҳурии Тоҷикистон бо Шоҳигарии Британияи Кабир ва Ирландияи Шимолӣ ёдовар шуда, ҳозиринро бо вазъи макроиқтисодӣ дар кишвар ва низоми бонкию суғурта шинос намуд.

Сафири Шоҳигарии Британияи Кабир ва Ирландияи Шимолӣ  Мэттю Лоусон мақсади ташрифи худро ҷиҳати ҳамкорӣ дар  татбиқи Барномаи дастгирии навовариҳои сиёсати иқтисодӣ («Policy Innovation Facility») иброз намуда, бинобар ба эътидол омадани вазъ дар Тоҷикистон аз татбиқи сиёсати пулию қарзии Бонки миллии Тоҷикистон бо назардошти раванди ҳадафгирии таваррум, нигоҳ доштани сатҳи таваррум дар доираи ҳадаф ва таъмини суботи макроиқтисодӣ изҳори ҳавасмандӣ намуд.

Ҷамолиддин Нуралиев аз татбиқи сиёсати босамари пулию қарзӣ бо истифода аз фишангҳои монетарӣ шарҳи мухтасар дода, таъкид намуд, ки новобаста аз таъсири манфии COVID-19 ба иқтисодиёти кишвар Бонки миллии Тоҷикистон дар натиҷаи  андешидани тадбирҳои қатъӣ тибқи нақшаи зиддибуҳронии худ, меъёри бозтамвилро тадриҷан поин бурда, меъёри захираҳои ҳатмиро аз рӯи пасандозҳо бо пули миллӣ аз 3 ба 1 фоиз ва бо асъори хориҷӣ аз 9 ба 5 фоиз паст кард, ки дар натиҷа дастрасии манбаъҳои иловагии пардохтпазириро дар ин давраи ҳассос барои ташкилоти қарзӣ таъмин намуд. Маҳз тадбирҳои саривақтӣ имкон фароҳам оварданд, ки низоми бонкӣ ба рушди иқтисодиёти кишвар саҳм гузошта, ҳаҷми пасандозҳо ва қарзҳо зиёд карда шуда, меъёри фоизии қарзҳо паст гардид. Сатҳи долларикунонӣ дар иқтисодиёт коҳиш ёфта, дороиҳои ташкилоти қарзӣ афзуданд, ки ин аз таъмини суботи молиявӣ дар кишвар шаҳодат медиҳад, — изҳор намуд Ҷамолиддин Нуралиев.

Ҷамолиддин Нуралиев таваҷҷуҳи Сафири Британияи Кабир ва Ирландияи  Шимолиро ба низоми бонкдории исломӣ ва низоми суғурта ҷалб намуда, барои тақвияти ҳамкорӣ дар фароҳам омадани заминаи меъёрии ҳуқуқӣ, омода намудани мутахассисони баландихтисос бо назардошти таҷрибаи байналмилалӣ барои оянда самарабахш арзёбӣ намуд.

Дипломати бритонӣ Мэттю Лоусон густариши минбаъдаи ҳамкориро дар бахши иқтисодӣ, бахусус низоми бонкӣ ва суғурта баҳри татбиқи барномаҳои нав хуш пазируфт.