Бо донишҷӯёни ятиму бепарастор аз муассисҳои таҳсилоти олӣ ва миёнаи касбии вилояти Суғд мулоқот доир гардид

ДУШАНБЕ, 19.02.2021 /АМИТ «Ховар»/. Дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд бо донишҷӯёни ятиму бепарастор  аз муассисҳои таҳсилоти олӣ ва миёнаи касбии вилояти Суғд мулоқот  доир  гардид. Дар  вохӯрӣ Раиси Федератсияи иттифоқҳои касабаи мустақили Тоҷикистон Маликшо Неъматзода, ки бо сафари  корӣ  дар ин вилоят қарор дошт, иштирок намуда, ба 15 нафар собиқадорони иттифоқи касаба ва 100 нафар донишҷӯёни ятиму бепарастор туҳфа тақдим намуд.

Тавре аз Федератсияи иттифоқҳои касабаи мустақили Тоҷикистон ба АМИТ «Ховар» хабар доданд, дар мулоқот  Маликшо Неъматзода зикр кард, ки давлату Ҳукумати мамлакат, бахусус Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади таъмини шароити зиндагии арзанда, омӯзиши касбу ҳунар  ва соҳибмаърифат гардидани наврасону  ҷавонони бепарастор, ки онҳоро фарзандони маънавии хеш мехонанд,  пайваста тадбирҳои муҳиму саривақтӣ меандешанд.

Дар мулоқот ҳамчунин аз донишҷӯён даъват ба амал оварда шуд, ки ҷавобан ба ин ғамхориҳо хубу аъло таҳсил намуда, мутахассисони варзида гардида, ба халқу Ватан содиқонаву софдилона хизмат намоянд.

Сипас чанде аз донишҷӯён оид ба  дастгириҳои пайвастаи  Пешвои  миллат муҳтарам Эмомалӣ Раҳмон нисбат ба ятимону бепарасторон  ибрози андеша намуда, зикр карданд, ки онҳо  бо хониши аъло ва рафтори намунавӣ сазовори боварии Сарвари давлат   гардида, дар  ободиву шукуфоии Тоҷикистони соҳибистиқлол  саҳми шоиста хоҳанд гузошт.