Дар ҷануби Тоҷикистон ҳаҷми истеҳсоли умумии маҳсулоти кишоварзӣ тақрибан 10% афзоиш ёфт

БОХТАР, 05.02.2021 /АМИТ «Ховар»/. Соли 2020 дар вилояти Хатлон ҳаҷми умумии истеҳсоли маҳсулоти кишоварзӣ қариб то 10% афзоиш ёфт,-изҳор намуд сардори Раёсати омори вилояти Хатлон Қурбон Ҳакимзода зимни нишасти матбуотӣ бо иштироки хабарнигорон.

Ба гуфтаи вай, соли гузашта ҳаҷми умумии маҳсулоти кишоварзӣ дар ҳамаи категорияҳои хоҷагиҳои минтақа бо нархҳои муқоисавӣ 16,985 миллиарду 21 ҳазор сомониро ташкил дод, ки ин 9,5% нисбат ба соли 2019 зиёд аст.

Ҳаҷми истеҳсолот дар соҳаи растанипарварӣ 12 миллиарду 305 миллиону 84 ҳазор сомонӣ ва дар чорводорӣ — 4 миллиарду 679 миллиону 937 ҳазор сомониро ташкил дод. Соли 2020 ҳамаи намудҳои хоҷагиҳои минтақа 1 миллиону 470 ҳазору 697 тонна сабзавот истеҳсол намуданд, ки нисбат ба соли 2019 116,8% зиёдтар аст. Дар ҳамаи категорияҳои хоҷагиҳои минтақа 589 ҳазору 89 тонна маҳсулоти полезӣ истеҳсол карда шудааст, ки нисбат ба ҳамин давраи соли 2019 105,4% зиёдтар аст.

Соли 2020 ҳамаи категорияҳои хоҷагиҳои минтақа 209 ҳазору 94 тонна мева истеҳсол кардаанд, ки дар муқоиса бо ҳамин давраи соли 2019  103,8% зиёд аст.

АКС аз Хадамоти матбуоти Президенти ҶТ