Дар Суғд дар майдони 650 гектар кишти картошкаи барвақтӣ гузаронида шудааст

ДУШАНБЕ, 18.02.2021. /АМИТ «Ховар»/. Вобаста ба иқлими минтақаҳо то 16 феврал дар хоҷагиҳои истеҳсолии 11 шаҳру ноҳияҳои миқёси вилояти Суғд дар майдони 650 га кишти картошкаи барвақтӣ гузаронида шудааст, ки ин нишондиҳанда ба 36,4 дарсади нақшаи дурнамо баробар мебошад.

Тавре масъулини идораи Сарраёсати кишоварзии вилояти Суғд ба хабарнигори минтақавии АМИТ «Ховар» иттилоъ доданд, чанд ҳафта инҷониб деҳқонони вилоят кишти картошкаи барвақтиро оғоз намудаанд.

Имсол кишоварзони вилояти Суғд тибқи нақшаи дурнамо дар майдони 1786 гектар кишти картошкаи барвақтӣ ба роҳ монда, ният доранд ба ин восита дар фаровон гардонидани бозори дохилии кишоварзӣ ва арзон намудани нархи аслии ин маҳсулот  саҳми назаррас гузоранд.

Корҳо дар ин самт бештар дар ноҳияҳои Б.Ғафуров, Спитамен, Ҷ.Расулов хубтар ба роҳ монда шудаанд.

Дар маҷмӯъ, майдони бештари кишти картошкаи барвақтиро дар вилоят ноҳияҳои Бобоҷон Ғафуров (480 га), Ҷаббор Расулов (300 га), Зафаробод ва Мастчоҳ (250 га), Спитамен, Конибодом ва Панҷакент (қариб 200 га) ташкил дода,  то 16 феврал дар ноҳияи Б.Ғафуров — 47,4 фоизи кишт, Спитамен – 49%, Ҷ.Расулов – 23%, Конибодом – 38,3%, Зафаробод – 22%, Панҷакент – 37,8%, Мастчоҳ – 18 фоизи корҳои кишт ба анҷом расонида шудаанд.