«ДАСТАРХОНОРОӢ». Ҷамоати деҳоти Ҳасан Ҳусейнови ноҳияи Ёвон ва Мактаб-интернати ҷумҳуриявии кӯдакони ятим ғолиби он шуданд

ЁВОН, 03.02.2021. /АМИТ «Ховар»/. Дар тарабхонаи «Ёвон»-и шаҳраки Ёвон  бо иштироки намояндагони ҳама ҷамоатҳои шаҳраку деҳот ва якчанд ташкилоту муассисаҳои ноҳиявӣ озмуни «Дастархонороӣ” баргузор гардид, ки мақсад аз он эҳё намудани таомҳои миллӣ ва бо истифодаи сарфакории моҳирона оростани дастархон дар тӯю маъракаҳо мебошад.

Дар озмун ҳамаи  иштирокчиён  бо  омодагии  ҷиддӣ иштирок намуда, намунаҳои дастурхони миллиро ба маърази тамошо гузоштанд. Кадбонуҳои ҳунарманди ноҳия бо пешниҳоди дастархони пурнозу  неъмат,  ки  аз  қурутобу  шакароб,  ширбиринҷу  ширкаду, шавлаи баширу гардсӯз, умочу рубич, чанголиву фатирмаска, навъҳои рангоранги маҳсулоти хамирӣ, аз қабили кулчаҳои хурду калони тӯйӣ, нони тунук, гирдача, фатир, фатири қаламагӣ, сатрӣ, тобагӣ, таҳмол, қалама, кулчақанд, орзуқ, чагалдак, чалпак, сузма, сала, самбӯсаи варақӣ, хӯришҳои мухталифи бомазза мураттаб гардида буд, дар эҳё намудани анвои гуногуни таомҳои миллӣ ва сарфакорона оростани дастурхон ҳунари воло нишон доданд.

Раиси ноҳияи Ёвон Ҷамшед Саидзода ба ҳунари ҳар иштирокчии озмун баҳои баланд дода, зикр намуд, ки дастархонороӣ ҷузъи муҳими фарҳанги мо буда, чунин озмунҳо барои тавсеаи фарҳанги дастархондорӣ, сарфакоронаву моҳирона оростани хони тоҷикӣ, ба ҳаёти мустақилона омода шудани духтарон мусоидати фаъол менамояд. Ҳамзамон истифодаи маҳсулоти хушсифату аз ҷиҳати экологӣ тозаи ватанӣ барои нигаҳдошти саломатии мардум бисёр нофеъ мебошад.

Комиссияи озмун ҳунари кадбонуҳоро баҳогузорӣ намуда, хулоса баровард, ки миёни ҷамоатҳои шаҳраку деҳот ҷойи 1-ум ба Ҷамоати деҳоти  Ҳасан Ҳусейнов, ҷойи 2-юм ба Ҷамоати деҳоти Гулсара Юсуфова ва ҷойи 3-юм ба Ҷамоати  деҳоти Ситораи Сурх сазовор дониста шавад.

Инчунин миёни ташкилоту муассисаҳо ҷойи 1-ум ба Мактаб-интернати ҷумҳуриявӣ барои кӯдакони ятими ноҳия, ҷойи 2-юм ба Коллеҷи технологӣ-фармасевтӣ ва ҷойи 3-юм ба Литсейи касбии техникӣ сазовор дониста шуд.

Ғолибони озмун  бо дипломҳою туҳфаҳои хотиравӣ ва ҳама иштирокчиёни озмун бо сипосномаҳои мақомоти иҷроияи ҳокимияти давлатии ноҳия қадрдонӣ карда шуданд.