Лоиҳаҳои сармоягузории давлатӣ дар ВМКБ дар ҳоли густариш қарор доранд

ХОРУҒ, 17.02.2021 /АМИТ «Ховар»/. Соли гузашта дар шаҳру ноҳияҳои Вилояти Мухтори Кӯҳистони Бадахшон амалисозии 11 лоиҳаи сармоягузории давлатӣ ба маблағи 200,7 миллион сомонӣ оғоз ёфта, бо сабаби бемории ҳамагири КОВИД-19 татбиқи баъзе лоиҳаҳо каме ба таъхир афтод, ки дар даҳаи аввали соли равон ба итмом расонда мешаванд.

Сардори раёсати сармоягузорӣ ва идораи амволи давлатии вилоят  Зикрихудо  Самадов зимни нишасти матбуотӣ изҳор дошт, ки “лоиҳаҳои нави сармоягузорӣ дар соҳаи роҳу нақлиёт, сохтмони пулҳои мошингузар, неругоҳҳои хурди барқӣ, хоҷагии манзилию коммуналӣ, кишоварзӣ ва амсоли инҳо ба нақша гирифта шудаанд, ки бештарашон то 30-солагии ҷашни Истиқлоли давлатӣ мавриди баҳрабардорӣ қарор мегиранд. Яке аз дигар самтҳои фаъолияти  Раёсати сармоягузорӣ ва амволи давлатӣ- ин рушди соҳаи соҳибкорӣ ва дастгирии бахши хусусӣ мебошад. Зеро нақши бахши хусусӣ дар ғанисозии буҷаи давлатӣ калон аст. Сол аз сол   теъдоди  соҳибкорони инфиродӣ  дар шаҳру ноҳияҳои вилоят рӯ ба афзоиш ниҳода, шумораашон то имрӯз 3 ҳазору 400 нафарро ташкил медиҳад. Теъдоди соҳибкороне, ки бо патент фаъолият доранд, дар муқоиса ба як соли пеш  56 нафар ва онҳое, ки дар асоси шаҳодатнома фаъолият мекунанд,  65 нафар зиёдтар аст. Бо афзудани шумораи соҳибкорон табиист, ки маблағи  буҷа рӯ ба афзоиш мениҳад ва имконияти сармоягузорӣ ба соҳаи дигари иқтисодию иҷтимоӣ низ тавсеа меёбад”.

Сардори Раёсати сармоягузорӣ ва амволи давлатии вилоят гуфт, ки соли равон бо мақсади рушди соҳаи саноат чанд лоиҳаи сармоягузориро ба  ширкатҳои давлатию хориҷӣ  пешниҳод намуданд ва дар сурати амалӣ гаштани ин лоиҳаҳо ҳам мизони маҳсулоти дохилӣ афзоиш меёбад ва ҳам садҳо нафар бо ҷои кори доимӣ таъмин мегарданд.