Тоҷикистон ва Хорватия ба тавсеаи ҳамкорӣ дар бахши сайёҳии экологию кӯҳнавардӣ мароқ зоҳир намуданд

ДУШАНБЕ, 19.02.2021 /АМИТ «Ховар»/. Тоҷикистон бо Хорватия ҳамкориро дар бахши сайёҳӣ тақвият медиҳанд. Дар ин робита имрӯз дар Душанбе мулоқоти Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразодава бо Сафири Фавқулода ва Мухтори Ҷумҳурии Хорватия дар Ҷумҳурии  Тоҷикистон Рефик Шабанович доир гардид, ки дар он масъалаҳои густариши муносибатҳои дуҷонибаи Тоҷикистон ва Хорватия  дар соҳаи сайёҳӣ баррасӣ гардид, иттилоъ медиҳад Кумитаи рушди сайёҳии назди Ҳукумати Ҷумҳурии Тоҷикистон.

Сафири Хорватия ҳавасмандии кишварашро барои   тақвияти ҳамкорӣ дар рушди самтҳои гуногуни сайёҳӣ, аз ҷумла сайёҳии экологӣ, кӯҳгардӣ ва варзишӣ изҳор намуд.

Раиси Кумитаи рушди сайёҳӣ бо таваҷҷуҳ ба таҷрибаи пешрафтаи Хорватия дар соҳаи сайёҳӣ пешниҳод намуд, ки байни ду кишвар санадҳои дахлдори ҳамкорӣ ба имзо расиданд. Ҷониби Хорватия пешниҳодро бо хушӣ қабул карда, барои иқдомҳои муштарак дар ин самт изҳори омодагӣ намуд.

Мулоқот дар фазои дӯстию ҳамдигарфаҳмӣ гузашт.