ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкорони Ёвон то 30-солагии Истиқлоли давлатӣ зиёда аз 10 км роҳҳои асосии шаҳракро мумфарш мекунанд

ЁВОН, 20.03.2021. /АМИТ «Ховар»/. Соҳибкорони ноҳияи Ёвон Акбар Асадулло  ва Баҳриддин Ҷурахонов тасмим гирифтаанд, ки дар ҳамкорӣ бо мақомоти иҷроияи ҳокимияти давлатии ноҳия то ҷашни 30-солагии Истиқлоли давлатӣ зиёда аз 10 км роҳҳои асосии шаҳраки Ёвонро мумфарш намоянд.

Тавре мухбири минтақавии АМИТ «Ховар» иттилоъ медиҳад, бахшида ба  ҷашни миллӣ  ва Наврӯзи Аҷам дар ноҳияи Ёвон корҳои созандагию ободонӣ вусъати тоза гирифтаанд, ки дар ин ҷода саҳми соҳибкорони маҳаллӣ хеле калон мебошад.

Шурӯъ аз 16 март  бо ташаббуси мақомоти иҷроияи ҳокимияти давлатии ноҳияи Ёвон ва саҳми соҳибкор Акбар Асадулло мумфаршкунии роҳи кӯчаи Меҳвари маркази ноҳияи Ёвон оғоз гардид. Чанде пештар бо саҳми соҳибкор Баҳриддин Ҷурахонов роҳҳои кӯчаи Кароматулло Қурбонов ва як қисмати кӯчаи Мирзо Турсунзода аз таъмири асосӣ бароварда шуданд.

Масъулини шуъбаи рушди иҷтимоӣ ва робита бо ҷомеаи ноҳияи Ёвон мегӯянд, ки хушбахтона, имрӯзҳо тамоми сокинони ноҳия тавассути ҳашарҳои умумӣ дар ҳар кӯчаву маҳалла даст ба корҳои созандагӣ зада, дар ободонии диёри худ саҳм мегузоранд.