Барои ҷалби муҳоҷирони меҳнатӣ аз Тоҷикистон дар Ҷумҳурии Бошқирдистон гурӯҳи корӣ ташкил мешавад

Март 5, 2021 09:49

ДУШАНБЕ, 05.03.2021 /АМИТ «Ховар»/. 3 март вохӯрии Консули генералии Ҷумҳурии Тоҷикистон дар шаҳри Уфа Саид Эмом бо муовини Сарвазир-вазири оила, меҳнат ва ҳимояи иҷтимоии аҳолии Ҷумҳурии Бошқирдистон Ленара  Иванова баргузор гардид.

Тавре хабарнигори махсуси АМИТ «Ховар» дар Федератсияи Россия Садбарги БОҚӢ иттилоъ медиҳад,    Л.  Иванова дар ҷараёни суҳбат оид ба дастовардҳои имрӯзаи Ҷумҳурии Бошқирдистон дар соҳаҳои гуногун, аз ҷумла иқтисодиёт ва нақлиёт, саноату савдо, маорифу фарҳанг ва сайёҳӣ  изҳори назар намуда,  муносибатҳои Ҷумҳурии Тоҷикистон ва Ҷумҳурии Бошқирдистонро дар соҳаҳои маорифу фарҳанг, иқтисоду савдо ва сайёҳӣ мусбат арзёбӣ ва илова   намуд, ки дар оянда низ ҷиҳати рушди ҳамкории мутақобилан судманд қадамҳои устувортар хоҳем гузошт.

Ҷонибҳо атрофи муносибатҳои Тоҷикистон ва Бошқирдистон, инчунин сафари Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Бошқирдистон ва таъсири  ин сафар ба раванди густариши муносибатҳои дуҷониба суҳбат намуданд.

Консули генералии Ҷумҳурии Тоҷикистон дар шаҳри Уфа Саид Эмом оид ба рушди ҳамкории судманд байни Ҷумҳурии Тоҷикистон ва Ҷумҳурии Бошқирдистон дар соҳаҳои иқтисодиёту нақлиёт, саноат, энергетика, маорифу фарҳанг, инчунин оид ба ҷалби соҳибкорони ҳарду кишвар баҳри ҳамкории муштарак ва иҷозати сафари дастаҷамъонаи муҳоҷирони меҳнатӣ дар шароити бемории коронавируси нави COVID-19 ибрози назар намуда, доир ба фазои сармоягузорӣ дар соҳаҳои афзалиятноки кишвар, аз қабили гидроэнергетика, кишоварзӣ, сайёҳӣ ва саноати кӯҳиву сабук маълумот дод.

Ҳамзамон ба иштирокчиёни вохӯрӣ оид ба чорабиниҳои авлавиятноки раёсати Ҷумҳурии Тоҷикистон дар Созмони ҳамкории Шанхай барои солҳои ‎2020-2021, ки ба 20-солагии таъсиси Созмони мазкур рост меояд, маълумот дода шуд.

Дар  идомаи суҳбат пешниҳод гардид, ки бо дарназардошти бемории коронавируси нави COVID-19  ва баста шудани марзҳо ҷиҳати ҳалли роҳҳои ҷалби дастаҷамъонаи муҳоҷирони меҳнатии кишвар ва ширкати онҳо дар сохтмонҳои иншооти бузург ва соҳаҳои гуногуни Ҷумҳурии Бошқирдистон, ки ба нафъи тарафайн мебошад, ҳарду ҷониб бояд кӯшиш ба харҷ диҳанд.

Зимни суҳбат муовини Сарвазир — вазири оила, меҳнат ва ҳимояи иҷтимоии аҳолии Ҷумҳурии Бошқирдистон Л. Иванова баён намуд, ки дар ҳақиқат Ҷумҳурии Бошқирдистон ба муҳоҷирони меҳнатӣ барои сохтмони иншооти бузург ниёз дорад. Мавсуф ба намояндагони мақомоти дахлдори кишвар, ки дар вохӯрӣ иштирок доштанд, супориш дод, ки рӯзҳои наздик гурӯҳи  корӣ ташкил карда, роҳҳои ҳалли ҷалби дастаҷамъонаи муҳоҷирони меҳнатӣ аз Тоҷикистонро дида  бароянд.

Дар вохӯрӣ ҳамчунин шахсони масъули сохтору идораҳои гуногун, аз ҷумла корҳои дохилӣ, меъморию сохтмонӣ, равобити иқтисодӣ, савдо ва саноати Ҷумҳурии Бошқирдистон ва аз ҷониби Ҷумҳурии Тоҷикистон намояндаи Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия Бахтиёр Ятимов иштирок намуданд.

Март 5, 2021 09:49

Хабарҳои дигари ин бахш

«БАЧА АЗИЗ, ОДОБАШ АЗ ОН АЗИЗТАР…». Ба таълиму тарбияи фарзандон набояд бетарафӣ зоҳир намуд
Маркази тадқиқоти стратегии Тоҷикистон ва Институти байналмилалии Осиёи Марказӣ масоили ҳамкории илмию таҳлилиро баррасӣ намуданд
35-СОЛАГИИ ИСТИҚЛОЛИ ДАВЛАТӢ. Беморхонаи марказии ноҳияи Темурмалик пурра навсозӣ гардид
ЗАБОН ДОНӢ-ҶАҲОН ДОНӢ. Аз 1 апрел кормандони мақомоти давлатӣ, худидоракунии маҳаллӣ ва ташкилотҳои давлатӣ ба омӯзиши ҳатмии забонҳои хориҷӣ фаро гирифта мешаванд
Дар ноҳияи Айнӣ сеюмин ҳамоиши гирандагони стипендияи президентӣ баргузор шуд
НАВРӮЗИ ХУҶАСТАПАЙ МУЖДАИ НЕКИ БАҲОРИ ХУРРАМ. Дар Суғд Ҷашни байналмилалии Наврӯз бо шукуҳи хоса таҷлил шуд
Тоҷикистон терроризму ифротгароиро қотеона маҳкум менамояд
24 МАРТ — РӮЗИ ҶАҲОНИИ МУБОРИЗА БО БЕМОРИИ СИЛ. Ҳадаф аз он огоҳӣ, пешгирӣ ва мубориза бар зидди ин беморӣ мебошад
ИМРӮЗ ДАР ТОҶИКИСТОН — РӮЗИ ГУЛ ВА НИҲОЛШИНОНӢ. Соли 2023 дар ҷумҳурӣ беш аз 1 миллион бех ниҳоли дарахтони гуногун шинонида шуд
МАСЛИҲАТИ МУТАХАССИС. Истеъмоли гулкарам масунияти инсонро боло мебардорад
МАСЛИҲАТИ МУТАХАССИС. Истеъмоли ғизои солим беҳтарин роҳи ҳифзи солимии шахс мебошад
Кормандони Вазорати меҳнат, муҳоҷират ва шуғли аҳолӣ ҷашни Наврӯзро бо тантана таҷлил намуданд