Дар МОИ Тоҷикистон ба маблағи қариб 200 миллион сомонӣ маҳсулот истеҳсол гардидааст

ДУШАНБЕ, 02.03.2021 /АМИТ «Ховар»/. Дар минтақаҳои озоди иқтисодии Тоҷикистон дар зарфи соли сипаригардида 1100 ҷойи корӣ таъсис дода шудаанд. Ин дар ҳолест, ки дар ин давра дар минтақаҳои озоди иқтисодии кишвар  ба маблағи  қариб 200 миллион сомонӣ  маҳсулот истеҳсол гардид.

Вазорати рушди иқтисод ва савдои Тоҷикистон иттилоъ медиҳад, ки  ҳоло дар минтақаҳои озоди иқтисодии Тоҷикистон  72 ширкати ватанию  хориҷӣ ҳамчун субъект  ба қайд гирифта шудаанд, ки аз ин омор 30 субъект ба Минтақаи озоди иқтисодии «Суғд», 25 субъект ба Минтақаи озоди иқтисодии «Данғара», 11 субъект ба Минтақаи озоди иқтисодии  «Панҷ», 5 субъект ба Минтақаи озоди иқтисодии «Ишкошим» ва 1 субъект ба Минтақаи озоди иқтисодии «Кӯлоб» рост меояд. Аз теъдоди умумии  субъектҳои  бақайдгирифташуда 25 субъект  фаъолияти истеҳсолӣ  ва содиротию воридотӣ ба роҳ мондаанд. Дигар субъектҳо ба корҳои сохтмонӣ  ва ворид намудани таҷҳизоти истеҳсолӣ машғуланд.

Гуфта мешавад, ки ҳаҷми сармоягузорӣ  дар минтақаҳои озоди иқтисодии кишвар  соли гузашта ба зиёда аз 43 миллион  сомонӣ  баробар гардид, ки аз ин омор 24,3 миллион  сомонӣ ба Минтақаи озоди иқтисодии «Данғара», 16,9 миллион сомонӣ ба Минтақаи озоди иқтисодии «Суғд»  ва 2,1 миллион сомонӣ ба Минтақаи озоди иқтисодии   «Панҷ» рост меояд.

ДАР АКС: Минтақаи озоди иқтисодии «Данғара». Акс аз бойгонии АМИТ «Ховар»