Дар Суғд Фестивали атласу адрас доир мешавад

ДУШАНБЕ, 13.03.2021 /АМИТ «Ховар»/. Бахшида ба 30-солагии Истиқлоли давлатии Ҷумҳурии Тоҷикистон ва Солҳои рушди деҳот, сайёҳӣ ва ҳунарҳои мардумӣ  моҳи майи соли равон дар вилояти Суғд  Фестивали вилоятии атласу адрас доир мегардад. Ба ғолибон аз рӯи бахшҳои «Беҳтарин либоси кӯдакона», «Беҳтарин либоси расмӣ», «Беҳтарин либоси идона» ва «Беҳтарин либоси арӯсию домодӣ» мукофотҳои пулӣ дар ҳаҷми аз 2000 сомонӣ то 4000 сомонӣ супорида мешаванд.

Тавре аз хадамоти матбуоти Раиси вилояти Суғд  ба АМИТ «Ховар» иттилоъ доданд, дар фестивали мазкур ҳамаи ҳунармандон, корхонаҳои саноатӣ ва истеҳсолӣ, дӯзандагӣ, муассисаҳои таълимӣ, марказҳои омӯзиши ҳунарҳои миллӣ, тарроҳон ва дӯзандагони алоҳида метавонанд ширкат варзанд.

Фестивали вилоятии атласу адрас бо мақсади рушди соҳаи саноати сабук, аз ҷумла ривоҷу равнақ бахшидан ба истеҳсоли матоъҳои атласу адрас, тарғиби либосҳои миллии аз матои табиӣ истеҳсолшаванда ва тарбияи зебоипарастӣ баргузор мегардад.

Фестивал дар ду давр сурат гирифта, дар даври вилоятии он ғолибони даври аввал иштирок мекунанд.