Дар Тоҷикистон Ҳафтаи тақвияти маърифати экологӣ таҳти унвони «Тозагии соҳил — гарави саломатӣ» оғоз ёфт

ДУШАНБЕ, 10.03.2021 /АМИТ «Ховар»/. Бахшида ба 30-солагии Истиқлоли давлатии Ҷумҳурии Тоҷикистон аз 9 то 13 март бо ташаббуси Ташкилоти ҷамъиятии «Пайравони Пешвои миллат»  дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҷумҳурӣ  таҳти унвони «Тозагии соҳил — гарави саломатӣ» Ҳафтаи тақвияти маърифати экологӣ доир мегардад.

Тавре муовини Раиси Кумитаи кор бо ҷавонон ва варзиши ҷумҳурӣ Дилноза Аҳмадзода ба хабарнигори  АМИТ «Ховар» иттилоъ дод, ҳафтаи мазкур дар ҳошияи таъкидҳои пайвастаи Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон роҳандозӣ гардида,  ҷиҳати тарбияи насли ҷавони мамлакат дар рӯҳияи маърифати экологӣ заминагузор мебошад. Он инчунин дар доираи корҳои созандагиву бунёдкорӣ, иқдомҳои созанда ва  ташаббускории ҷавонон сурат мегирад.

Мақсад аз баргузории Ҳафтаи тақвияти маърифати экологӣ бештар доир намудани корҳои ободонию бунёдкорӣ буда, тасмим гирифта шудааст, ки бо ҷалби васеи ҷавонон, волонтёрони  Ташкилоти ҷамъиятии «Пайравони Пешвои миллат» амалҳои созандагиву оммавӣ роҳандозӣ шуда, атрофи биноҳо ва соҳили рӯду дарёҳо аз партовҳо тоза карда шаванд.

 Ба зикри Дилноза Аҳмадзода, бахшида ба 30-солагии Истиқлоли давлатӣ дар асоси нақшаи тасдиқгардидаи Кумитаи ҷавонон ва варзиши мамлакат 30 ҳафтаи созандагиву бунёдкорӣ доир шуда, дар чаҳорчӯби он баргузории 30 маъракаи оммавӣ,  ташаббускорӣ ва фароғати ҷавонон  дар назар дошта шудааст.