Дар Турсунзода оид ба рушди сайёҳӣ бо иштироки намояндагони ВАО, ширкатҳои сайëҳӣ ва марказҳои касбомӯзӣ семинар доир мегардад

ДУШАНБЕ, 02.03.2021 /АМИТ «Ховар»/. Бо ташаббуси мақомоти  иҷроияи ҳокимияти давлатии шаҳри Турсунзода  моҳи марти соли  равон бо иштироки намояндагони воситаҳои ахбори омма,  ширкатҳои сайëҳӣ, марказҳои касбомӯзӣ ва бахшу сохторҳои дахлдор баргузории семинар-омӯзиш оид ба рушди сайëҳӣ дар назар дошта шудааст.

Тавре  аз мақомоти иҷроияи ҳокимияти давлатии шаҳри Турсунзода ба АМИТ «Ховар» хабар доданд, мақсад аз баргузории ин семинар-омӯзиш рушди инфрасохтор ва муаррифии  имкониятҳои сайёҳии шаҳр  мебошад.

«Шаҳри Турсунзода табиати зебою нотакрор ва мавзеъҳои хушбоду ҳаво, боғҳои ангур ва дигар меваҳо, растаниву чашмаҳои шифобахш дорад, ки метавонад барои рушди соҳаи сайёҳӣ мусоидат намояд. Бахусус, рушди соҳаи сайёҳии эко-аграрӣ, пиёдагардии куҳӣ, шикор, ёдгориҳои таърихию фарҳангӣ барои ин  шаҳр хос мебошад. Зеро меваҳои шаҳдбор ва аз лиҳози экологӣ тозаи шаҳри Турсунзода, аз ҷумла ангур, шафтолу, зардолу, гелос, себ, нок ва ҷамъоварии онҳо бевосита дар боғҳо, сабзавоти тару тоза, маҳсулоти полезӣ, афшураи меваю сабзавот ва дигар маҳсулот заминаи рушди сайёҳии кишоварзӣ ё худ агротуризм ба шумор мераванд. Бо назардошти ташкили боғоти намунавии ангур ва парвариши навъҳои беҳтарин дар баробари меҳмонони сатҳи олӣ ва ҳайатҳои расмии хориҷӣ сайёҳони дохилию хориҷи аз боғҳои ангури ин минтақа дидан мекунанд ва он ҳамчун бренди сайёҳӣ муаррифӣ мегарданд»,-афзуд манбаъ.

Бояд тазаккур дод, ки  шаҳри Турсунзода дорои мероси бойи таърихию фарҳангӣ ва захираҳои табиию фароғатие мебошад, ки барои рушди сайёҳии дохилӣ ва қабули сайёҳони хориҷӣ мусоидат менамоянд.

Имкониятҳои рушди сайёҳӣ дар шаҳр-хоҷагии ҷангалу шикори «Қаратоғ», фермаи «Оҳуи холдор» воқеъ дар базаи хоҷагии ҷангалу шикори «Қаратоғ», боғи таърихӣ — табиии «Ширкент», саёҳати кӯҳӣ дар қаторкӯҳҳои Ҳисор, изи динозаврҳо дар мавзеи «Ширкент», деҳаи қадимаи кӯҳии «Пашми куҳна» дорои табиати нотакрор дар дараи «Ширкент» мебошанд. Инчунин, дар шаҳр бештар аз 20 адад муассисаҳои истироҳативу солимгардонӣ, аз ҷумла, КВД «Ширкати Алюминийи Тоҷик», «Табибон», «Шифо», «Эдем Аква», «Азиза», «Муфид» ва дигарон амал менамоянд. Инчунин, имкониятҳои мавзеъҳои Патру, дараи Ҳакимӣ, Париён ва кӯли Темурдара аз мавзеъҳои ҷолиб ва тамошобоби минтақа ба ҳисоб мераванд.

Ёдовар мешавем, ки бо ташаббуси мақомоти иҷроияи ҳокимияти давлатии шаҳри Турсунзода ва ҷалби Хоҷагии моҳипарварии «Парвиз» дар соҳили дарёи Қаратоғ, воқеъ дар деҳаи Маданият корҳои соҳилмустаҳкамкунӣ босуръат ҷараён доранд.Аз шуъбаи ҳифзи муҳити зисти шаҳри Турсунзода иттилоъ дода шуд, ки дарозии хатти соҳилмустаҳкамкунӣ беш аз 1,5 км-ро ташкил медиҳад. Корҳои соҳилмустаҳкамкунӣ барои самаранок истифода бурдани беш аз 7 га заминҳои соҳили дарё шароит муҳайё месозанд. Тибқи нақша, парвариши моҳӣ дар Хоҷагии моҳипарварии «Парвиз» ду маротиба афзун гардида, инчунин дар ин макон мавзеъҳои сайёҳӣ ва шикори моҳӣ бунёд мегарданд, ки ба рушди агротуризм мусоидат менамоянд.

Кумитаи рушди сайёҳӣ дар ҳамкорӣ бо Мақомоти иҷроияи ҳокимияти давлатии шаҳри Турсунзода хатсайри нави сайёҳиро таъсис доданд, ки мақсад аз он рушди инфрасохтори сайёҳӣ ва муаррифии  имкониятҳои сайёҳии Тоҷикистон мебошад.

Хатсайри мазкур мавсимӣ буда, фарогири саёҳати пиёдагардӣ, экологӣ, таърихию фарҳангӣ ва кишоварзӣ мебошад. Сайёҳони дохилию хориҷӣ имкон доранд, дар доираи хатсайри мазкур аз маркази шаҳри Турсунзода то минтақаи сайёҳии Қаратоғ дидан намоянд. Ҳамчунин сайёҳон метавонанд аз намуди нақлиёти автобус ва нақлиёти хурд ҳам истифода баранд. Хатсайри мазкур аз Боғи истироҳатию мадании «Наврӯзгоҳи баҳори истиқлол»-и шаҳри Турсунзода оғоз гардида, дар истироҳатгоҳи Курани ҷамоати Қаратоғ анҷом меёбад. Хатсайри пиёдагардони «Баҳори Истиқлол» асосан мавзеи сайёҳии дараи «Қаратоғ», «Кӯли Париён», «Темурдара» ва мавзеи Ширкентро дарбар мегирад, ки онҷо пайи динозаврҳо мавҷуд аст.

Рухсораи НУР,
АМИТ «Ховар»