Давлати Қатар барои соли таҳсили 2021 ба шаҳрвандони Тоҷикистон бурсияҳо ҷудо намудааст

ДУШАНБЕ, 16.03.2021. /АМИТ «Ховар»/. Давлати Қатар барои соли  таҳсили 2021-2022 ба шаҳрвандони Ҷумҳурии Тоҷикистон бурсияҳои таҳсилӣ дар зинаи бакалавр, магистратура ва доктор PhD ҷудо намудааст.

Тавре аз Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон ба хабарнигори АМИТ «Ховар» иттилоъ доданд, довталабон метавонанд дар вебсайти донишгоҳҳо аз рӯи ихтисосҳои муайяннамудаи Давлати Қатар худро номнавис намоянд. Инчунин маълумот оид ба стипендия, тартиби қабул ва қоидаҳои таълимии аз ҷониби муассисаҳо тасдиқшуда дар вебсайти онҳо ҷой дода шудааст.

Ҳамчунин доштани сертификатҳои малакадонии забони англисӣ (TOEFL/IELTS, GRE, GMAT, MCAT, ACT/SAT) барои довталабон ҳатмист. Дар ҳолати пешниҳод накардани сертификатҳо, ҳуҷҷатҳои пешниҳоднамудаи онҳо мавриди баррасӣ қарор намегиранд.

Маълумоти муфассалро метавонед аз телефони  223-23-59 ё почтаи электронӣ: mbb-2008@mail.ru  пайдо намоед.