МАСЛИҲАТИ МУТАХАССИС. Усули ҳалқабурӣ ба фаровонии ҳосили дарахтон мусоидат мекунад

ДУШАНБЕ, 12.12.2021. /АМИТ «Ховар»/. Агар дарахтони донакдор ва тухмакдор бисёр гул карда бошанд, боғпарвар бояд барои ба ҳосил овардани  ин гулҳо усули ҳалқабурӣ (ҳалқабандӣ) анҷом диҳад. Яъне дастакҳои дуюм ва сеюм аз қисми поини шохзор  бо корд ба андозаи як сантиметр ҳалқабурӣ карда шаванд. Зеро ҳамаи он моддаҳои пластикӣ ва ғизое, ки тавассути бофтаҳо аз реша ба боло мераванд, ҳаракати онҳо каме суст гардида, гулҳои шукуфта ба ҳосил медароянд. Чунин тавсия медиҳад директори Институти боғпарварию сабзавоткории Академияи илмҳои кишоварзии Тоҷикистон, доктори илмҳои кишоварзӣ Ҳикматулло Назиров ба боғпарварони мамлакат.

Мавсуф иброз намуд, ки ин таҷриба аз ҷониби олимони кишоварзӣ гузаронида шуда, ҳосили хуб ба бор овардааст.

«Як усули дигари пурра ба ҳосил даровардани гулҳои дарахтон- ин гардолудкунӣ мебошад. Агар мо боғ бунёд намоем, бояд ба гардолудкунандаҳои он аҳамияти ҷиддӣ диҳем. Яъне, агар дар як гектар 300 дарахт ҷойгир карда шавад, бояд на камтар аз 40 дарахти гардолудкунанда шинонида шавад.  Дарахти гардолудкунанда гуфта, навъҳои гуногуни дарахтонро меноманд. Дар сурати дар як қатор шинонидани як навъ дарахтон ҳосили кам медиҳанд»,- гуфт Ҳикматулло Назиров.

Тавре олимони соҳаи кишоварзӣ тавсия медиҳанд, башаклдарории дарахтон  пеш аз гулкунии онҳо гузаронида мешавад.

Ҳамсуҳбати мо тавсия медиҳад, ки башаклдарории дарахтон аз охири  моҳи ноябр ва декабр оғоз мегардад. Аммо боғпарвар як тавсияро хуб донад, ки башаклдарории дарахтони мевадиҳанда  бояд пас аз гузаштани мавсими сармо анҷом дода шавад. Зеро дар сурати анҷом додани башаклдарорӣ дар мавсими сармо онҳо ба касалиҳои гуногун дуҷор мегарданд.