Агентии авиатсияи гражданӣ ширкатҳои ҳавопаймоии «СомонЭйр» ва «UTair»-ро ҳушдор дод, ки нархи чиптаро беасос боло набаранд

Апрель 5, 2021 14:00

ДУШАНБЕ, 05.04.2021 /АМИТ «Ховар»/. Агентии авиатсияи граждании назди Ҳукумати Ҷумҳурии Тоҷикистон аз болоравии нархи беасоси чиптаи ҳавопаймоҳо дар хатсайри Душанбе-Москва-Душанбе ҷилавгирӣ намуда, дар ин самт дар ҳамкорӣ бо дигар мақомоти марбута назорати қатъӣ ба роҳ мемонад. Чунин гуфт Директори Агентии авиатсияи граждании назди Ҳукумати Ҷумҳурии Тоҷикистон Икром Субҳонзода.

Ин дар ҳолест, ки имрӯз дар Душанбе бо иштироки роҳбарияти Агентии авиатсияи граждании назди Ҳукумати ҷумҳурӣ,  намояндагони Прокуратураи нақлиёти Тоҷикистон, Кумитаи давлатии амнияти миллии Ҷумҳурии Тоҷикистон, ширкати ҳавопаймоии «Сомон Эйр», намояндагии ширкати ҳавопаймоии Федератсия Россия дар кишварамон «UTair» ва Агентии алоқаи ҳавоӣ оид ба назорати қатъии болоравии нархи беасоси чипта ҷаласаи фаврӣ баргузор гардид.

Дар ҷаласаи фаврӣ Икром Субҳонзода  аз роҳбарону намояндагони ширкатҳо ва нуқтаҳои фурӯши чиптаи ҳавопаймо дархост кард, ки чиптаҳоро аз нархҳои муайянкардашуда гаронтар нафурӯшанд. Тибқи протоколи ҷаласа аз 26 марти соли равон ва дар мувофиқа бо ширкатҳои ҳавопаймоии «Сомон Эйр» ва «UTair» нархи рафтуомади чиптаи ҳавопаймо дар масири   Душанбе-Москва-Душанбе то 500 доллари амрикоӣ муқаррар гардида буд. Ширкатҳои ҳавопаймоии «Сомон Эйр» ва «UTair»  нархи чиптаи ҳавопаймоиро бо назардошти талабот дар хатсайри Душанбе-Москва на зиёда аз 350 доллари амрикоӣ ва дар хатсайри Москва-Душанбе 150 доллари амрикоӣ муқаррар намуданд.

Мутаассифона, аз хабарҳои дар сомонаҳо ва шабакаҳои иҷтимоӣ нашршуда маълум гардид, ки муқаррароти протоколи болозикр аз ҷониби ширкатҳои «Сомон Эйр» ва «UTair»  ва агентиҳои чиптафурӯшӣ риоя нагардида истодаанд. Аз ин рӯ, дар ҷаласаи фаврӣ аз ширкатҳои ҳавопаймоии «Сомон Эйр» ва намояндагии ширкати ҳавопаймоии Федератсияи Россия дар кишварамон «UTair» қатъиян ва ҷиддӣ талаб карда шуд, ки  бо агентиҳои чиптафурӯшӣ ҷаласа баргузор намуда, фурӯши чиптаҳои ҳавопаймоӣ бо нархи мувофиқашудаи муқарраргардида амалӣ карда шуда, ба болоравии беасоси нархи чиптаи ҳавопаймо роҳ надиҳанд ва нархи чиптаро дар доираи арзиши аслӣ танзим намоянд.

Дар сурати риоя нагардидани талаботи муқарраргардида барои андешидани тадбирҳои қатъӣ аз ҷониби Агентии авиатсияи граждании назди Ҳукумати ҷумҳурӣ ба сохторҳои марбута дархост ирсол карда мешавад.

Акси аввал аз манбаъҳои боз

Апрель 5, 2021 14:00

Хабарҳои дигари ин бахш

Дар Душанбе оид ба интихобот машварати омӯзишӣ доир гардид
НИШАСТИ МАТБУОТӢ. Дар Тоҷикистон шумораи хизматчиёни давлатӣ ба беш аз 18 ҳазор нафар расид
ТАРҒИБИ ҲАЁТИ СОЛИМ. Аз имзои фармони Президенти Ҷумҳурии Тоҷикистон «Дар бораи танзими муомилоти маҳсулоти тамоку» 12 сол сипарӣ шуд
НИШАСТИ МАТБУОТӢ. Дар 56 корхонаи тобеи Кумитаи хоҷагии манзилию коммуналӣ системаи биллингӣ ҷорӣ гардид
СОЛИ БАЙНАЛМИЛАЛИИ ҲИФЗИ ПИРЯХҲО. Бахшида ба он «Телевизиони Сафина» озмуни «Беҳтарин филми мустанад» доир намуд
НИШАСТИ МАТБУОТӢ. Конвенсия оид ба ҳуқуқи маъюбон дар Тоҷикистон кай ба тасвиб мерасад?
НИШАСТИ МАТБУОТӢ. Соли 2024 6 корманди телевизион ва радио дар Туркия такмили ихтисос намуд
Дар Душанбе «Маҳфили ҷавононе, ки дар хориҷи кишвар таҳсил доранд» баргузор гардид
ШАҲОДАТНОМАИ ТАВАЛЛУД. Ҳар шахс дар мавриди бақайдгирии давлатии таваллуд ба насаб, ном ва номи падар ҳуқуқ дорад
НОМИ НАКӮ-НИСФИ ҲУСН. «Феҳристи номҳои миллии тоҷикӣ» мардуми моро бо ному насаби миллӣ ба оламиён муаррифӣ менамояд
«ҶОЙГОҲИ ЗАН-МОДАР ДАР ПЕШБУРДИ ОИЛА БЕНАЗИР АСТ». Дар Шаҳринав ҳамоиши фарҳангӣ-маърифатӣ доир гардид
Иштироки фаъолонаи ҷавонон дар раванди интихобот бозгӯи камолоти фарҳанги сиёсию ҳуқуқии онҳо аст