Ҷангҷӯёни мусаллаҳи гурӯҳи «Толибон» ба автомашинаи котиботи Маҷлиси сенати Афғонистон ҳамла карданд

ДУШАНБЕ, 12.04.2021 /АМИТ «Ховар»/. Полиси Кобул рӯзи якшанбе, 11 апрел дар бораи ҳамлаи ҷангҷӯёни гурӯҳи «Толибон» (мамнӯъ дар Тоҷикистон) ба автомашинаи котиботи Маҷлиси сенати Афғонистон дар Кобул иттилоъ додааст, хабар медиҳад АМИТ «Ховар» бо истинод ба шабакаи телевизионии tolonews.com.

Шоми шанбе ду ҷангҷӯи мусаллаҳи гурӯҳи «Толибон» ба автомашинаи котиботи Маҷлиси сенати Афғонистон ҳамла карданд. Дар натиҷа  ронандаи автомашина кушта ва посбонони котибот маҷрӯҳ шуданд.

Сухангӯи полиси Кобул Фирдавс Фарамарз гуфт, ки пас аз ин ҳодиса, байни неруҳои амниятӣ ва ҳамлагарон  задухӯрд  шурӯъ шуд, ки бар асари он яке аз ҳамлагарон кушта ва дуввумин захмӣ шуд. Инчунин ду корманди полис низ дар ин задухӯрд маҷрӯҳ шуд.

Дар хабари дигар «TOIOnews» бо истинод ба мақомоти маҳаллӣ омадааст, ки бар асари таркиши минаҳо дар вилоятҳои Ҳирот ва Сари Пули Афғонистон шаш тан ҷон бохтанд.

Масъули тандурустии Ҳирот гуфт, ки дар натиҷаи таркиши минаи дар канори роҳ фаршшуда се сарбози полис ҷон бохт.

Дар ҳамин ҳол, Муҳаммад Ҳаниф Ризоӣ, сухангӯи корпуси низомии «Шоҳин» гуфт, ки дар минтақаи Сӯзама Қалъаи вилояти Сари Пул бар асари таркиши мина се шаҳрванд, аз ҷумла ду кӯдак кушта шуд.

Вай инчунин гуфта, ки неруҳои артиш се минаи дигари дар канори роҳ гузоштаи «Толибон» -ро ошкор ва безарар карданд.

Мақомоти маҳаллии вилояти Фароҳ хабар додаанд, ки «Толибон» шоми имрӯз як додситони бознишастаро дар деҳаи Навда дар маркази вилоят тирборон ва куштанд.

«Толибон» ҳанӯз дар мавриди ин рӯйдодҳо изҳори назар накардаанд.