Дар Тоҷикистон истеҳсоли маҳсулоти саноатӣ дар 3 моҳ 17,4% зиёд шуд

ДУШАНБЕ, 19.04.2021 /АМИТ «Ховар»/. Дар Тоҷикистон истеҳсоли маҳсулоти саноатӣ дар 3 моҳи соли равон 17,4% зиёд шудааст, хабар медиҳад Агентии омори назди Президенти Ҷумҳурии Тоҷикистон.

Дар моҳҳои январ — марти соли 2021 ба маблағи 8201,1 миллион сомонӣ маҳсулоти саноатӣ, ба шумули соҳибкорони хусусӣ истеҳсол карда шудааст.

Омили асосии зиёд шудани ҳаҷми умумии маҳсулоти саноатӣ- ин афзоиши истеҳсолот дар саноати истихроҷ то — 32,4%, дар саноати коркард то — 18,4%, таъминоти барқ, интиқоли буғ, газ то — 11,6% мебошад.

Дар 3 моҳи ҳамин сол дар ҷумҳурӣ 2285 корхонаи саноатӣ фаъолият мекард, аз ҷумла: 269 корхона дар саноати истихроҷ, 1859 — дар саноати коркард, 76 — дар соҳаи таъминоти газ, барқ, буғ ва об, 81 — дар коркарди партовҳо.

Аз миқдори умумӣ: 695 корхона дар вилояти Суғд, 621 адад дар вилояти Хатлон, 493 адад дар Душанбе, 419 – то дар ноҳияҳои тобеи ҷумҳурӣ ва 57 адад  дар ВМКБ воқеъ мебошанд.

АКС аз бойгонии  АМИТ «Ховар»