Дар Тошканд таҳти раёсати ҷониби Тоҷикистон машваратҳои хадамоти иттилооти ВКХ кишварҳои узви СҲШ баргузор шуданд

ДУШАНБЕ, 26.04.2021 /АМИТ «Ховар»/. 22-23 апрел дар Тошканд дар Кумитаи иҷроияи Сохтори минтақавии зиддитеррористӣ (КИ РАТС СҲШ) таҳти раёсати ҷониби Тоҷикистон машваратҳои навбатии байниидоравии хадамоти иттилоотии кишварҳои узви СҲШ баргузор шуданд.

Тавре АМИТ «Ховар» бо истинод ба Вазорати корҳои хориҷии Тоҷикистон иттилоъ медиҳад, вохӯрии намояндагони хадамоти иттилоотӣ дар шакли омехта бо иштироки бевоситаи Қазоқистон, Қирғизистон, Россия, Тоҷикистон, Ӯзбекистон, Кумитаи иҷроияи РАТС СҲШ ва иштироки фосилавии Ҳиндустон, Чин, Покистон ва котиботи СҲШ баргузор гардид.

Баррасии роҳҳои ҳамкорӣ ва усулҳои инъикоси иттилоотӣ дар саммити ҷашнии СҲШ дар Душанбе моҳи сентябри соли равон ва дар ҷашни 20-солагии Созмон мавзӯи асосии рӯзномаи вохӯрӣ буд.

Иштирокчиён инчунин маърӯзаи котиботи СҲШ-ро дар бораи корҳои анҷомдода дар доираи фаъолияти иттилоотӣ дар 3 соли гузашта шуниданд.

Оид ба натиҷаи машваратҳо Протокол ба имзо расид.

АКСҲО аз ВКХ ҶТ