Донишкадаи муносибатҳои байналмилалии Москва 5 бурсияи таҳсилӣ дар зинаи бакалавр ҷудо намуд

ДУШАНБЕ, 18.04.2021/АМИТ «Ховар»/.  Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон иттилоъ медиҳад, ки Донишкадаи муносибатҳои байналмилалии Москва барои соли таҳсили 2021-2022 5 бурсияи таҳсилӣ дар зинаи бакалавр ҷудо намуд. Дар ин бора аз Муассисаи мазкур ба АМИТ «Ховар» иттилоъ доданд.

Бурсияҳо аз рӯи ихтисосҳои зерин: муносибатҳои байналмилалӣ, омӯзиши минтақавии хориҷӣ, иқтисодиёт, ҳуқуқшиносӣ, журналистика, реклама ва муносибатҳои ҷамъиятӣ, илмҳои сиёсӣ, идораи давлатӣ ва мунисипалӣ ва кори тиҷоратӣ мебошад.

Барои ноил гардидан ба бурсияҳо озмун дар се давр баргузор мегардад. Довталабоне, ки хоҳиши иштирок дар озмун доранд, ба бахшҳои минтақавии маҳали зисти Маркази миллии тестии назди Президенти Ҷумҳурии Тоҷикистон муроҷиат намоянд.

Инчунин ба маълумоти довталабон расонида мешавад, ки донистани забони русӣ ва англисӣ ҳатмист.

Телефон барои маълумот: 2-23-23-59

Акс аз бойгонӣ