Имрӯз ҷаласаи Шӯрои вазирони корҳои хориҷии ИДМ баргузор мешавад

Апрель 2, 2021 11:06

ДУШАНБЕ, 02.04.2021 /АМИТ «Ховар»/. 2 апрел дар Москва ҷаласаи Шӯрои вазирони корҳои хориҷии Иттиҳоди Давлатҳои Мустақил (ИДМ) таҳти раёсати Ҷумҳурии Беларус баргузор мешавад. Бори аввал аз моҳи октябри соли 2019 инҷониб ҷаласа дар қолаби ҳузурӣ сурат мегирад, хабар медиҳад АМИТ «Ховар» бо истинод ба хадамоти матбуоти Кумитаи иҷроияи ИДМ.

Қарор аст, ки вазирони корҳои хориҷӣ оид ба масъалаҳои мубрами рӯзномаи байналмилалӣ ва ҳамкорӣ дар чаҳорчӯби ИДМ мубодилаи афкор намуда, ҷараёни татбиқи Барномаи амалро оид ба густариши шарикӣ байни вазоратҳои корҳои хориҷии кишварҳои узви ИДМ ва татбиқи Нақшаи машваратҳои бисёрсатҳаи байни вазоратҳои корҳои хориҷиро дар доираи Иттиҳод дар соли 2020 баррасӣ кунанд.

Илова бар ин, вазирон санадҳоеро, ки ба баррасии Шӯрои сарони давлатҳои ИДМ пешниҳод карда мешаванд, қаблан мувофиқа мекунанд. Ин, пеш аз ҳама, лоиҳаи Муроҷиати Сарони давлатҳо ба халқҳои кишварҳои Иттиҳод ва ҷомеаи ҷаҳонӣ дар робита ба 80-солагии оғози Ҷанги Бузурги Ватании солҳои 1941-1945 мебошад.

Ду санаде, ки лоиҳаҳояшон барои тасдиқ аз ҷониби Шӯрои вазирон пешниҳод гардидаанд, баъдан барои баррасӣ ба Шӯрои сарони ҳукуматҳо фиристода мешаванд. Ин санадҳо ҳамкорӣ дар соҳаи геодезия, картография, кадастр ва таҳқиқи зондии фосилавии Замин ва таъсиси ташкилоти заминавӣ дар соҳаи тайёрии амалиётӣ-стратегии афсарони қувваҳои мусаллаҳро фаро мегиранд.

Интизор меравад, ки дар ин ҷаласа нақшаҳои амалии миёнамуҳлат оид ба татбиқи стратегияҳои дар Иттиҳод амалкунанда — рушди ҳамкорӣ дар соҳаи тарбияи ҷисмонӣ ва варзиш, ҳамкории байналмилалии ҷавонон ва соҳаи сайёҳӣ тасдиқ карда шаванд.

Пахши мустақими ҷаласаи Шӯрои вазирони корҳои хориҷии ИДМ-ро метавон дар портали интернетии ИДМ (e-cis.info) пайгирӣ намуд. Пахши барнома соати 12.00 ба вақти Москва оғоз мешавад.

Пас аз мулоқот нишасти матбуотӣ сурат мегирад. Пахши онро дар портали интернетии ИДМ низ дидан мумкин аст.

                          АКС аз Хадамоти матбуоти Кумитаи иҷроияи ИДМ

Апрель 2, 2021 11:06

Хабарҳои дигари ин бахш

Вакилони гурҷӣ бо кормандони ҷавони низоми хизмати дипломатии Тоҷикистон мулоқот намуданд
Шараф Шерализода бо муовини котиби давлатии Котиботи давлатии Швейтсария оид ба молияи байналмилалӣ мулоқот намуд
Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд