Раиси Кумитаи рушди сайёҳии Тоҷикистон бо мудири иҷроияи «ISC»-и Малайзия мулоқот намуд

ДУШАНБЕ, 15.04.2021. /АМИТ «Ховар»/. Бо ибтикори Сафорати Ҷумҳурии Тоҷикистон дар Куала-Лумпур дирӯз мулоқоти маҷозии Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразода бо роҳбари яке аз ширкатҳои бонуфузи сайёҳии Малайзия «ISC« Остин Зекка баргузор гардид.

Дар мулоқот масъалаҳои рушди ҳамкории тарафайн баррасӣ гардида, ба ҷониби малайзиягӣ таваҷҷуҳи бевоситаи Ҳукумати Ҷумҳурии Тоҷикистон ба соҳаи сайёҳӣ ҳамчун самти афзалиятнок ва калидӣ барои рушди иқтисоди миллӣ, хусусан роҳандозии имтиёзҳои муҳими андозию гумрукӣ, тартиби содаи дастрас намудани раводиди Тоҷикистон ба ҷаҳонгардон ва пешниҳоди раводиди бисёркаратаи 5-сола ба сармоягузороне, ки то як миллион доллар ворид месозанд, маълумот дода шуд.

Остин Зекка изҳор дошт, ки лоиҳаи таблиғотии “Malaysia Truly Asia”-ро тарҳрезӣ намудааст, ки дар натиҷаи роҳандозии он Малайзия ба яке аз кишварҳои рушдёфта дар дунё дар самти сайёҳӣ табдил ёфт.

Ҳамчунин ҷониби малайзиягӣ зимни мулоқот ҳавасмандии худро оид ба бартарияти сайёҳии Тоҷикистон, аз ҷумла иқлими мусоид, обу ҳавои тозаи экологӣ ва меҳмоннавозии тоҷикона баён намуд.

Остин Зекка зикр намуд, ки бо дарназардошти иқлими мусоид дар Тоҷикистон бо бародараш Адриан Зекка- муассис ва роҳбари яке аз машҳуртарин ширкати резортсозӣ (меҳмонхона) дар дунё бо номи «Aman» масъалаи сохтани меҳмонхонаро дар Тоҷикистон баррасӣ хоҳад намуд.

Ширкати мазкур дар кишварҳои Тайланд, ИМА, Чин, Япония, Туркия, Италия ва дигар давлатҳо зиёда аз 36 резорти панҷситорадор дорад.

Раиси Кумитаи рушди сайёҳӣ аз Остин Зекка даъват ба амал овард, ки дар вақти барояш мусоид ба Тоҷикистон ташриф орад. Ин даъват бо хушӣ пазируфта шуд.