Тоҷикистон ва Гурҷистон бори нахуст созишномаро дар бораи иртиботи байналмилалии автомобилӣ имзо карданд

Апрель 15, 2021 14:05

ДУШАНБЕ, 15.04.2021 /АМИТ «Ховар»/. Имрӯз дар Тбилиси Вазири нақлиёти Тоҷикистон Азим Иброҳим ва Вазири иқтисоди Гурҷистон Натия Турнава бо мақсади фаъол намудани ҳамкории тиҷоратӣ ва иқтисодӣ Созишномаро дар бораи иртиботи байналмилалии автомобилӣ имзо карданд, хабар медиҳад АМИТ «Ховар» бо истинод ба Вазорати иқтисоди Гурҷистон.

Тавре дар хабар омадааст, санади нав ба рушди минбаъдаи иртиботи автомобилӣ байни ду кишвар мусоидат мекунад.

Чунин созишнома байни Тоҷикистон ва Гурҷистон бори нахуст ба имзо расид.

Дар Вазорат зикр карданд, ки созишнома тартиби ҳамлу нақли дутарафаи борҳо, аз ҷумла борҳои транзитиро ба кишварҳои сеюм тибқи саҳмияҳои рухсатдодашуда муайян мекунад. Шумораи дақиқи онҳо ҳар сол мувофиқа хоҳад шуд.

Шарҳ дода шудааст, ки дар созишнома танзими масъалаҳои ҳуқуқии вобаста ба тамоми интиқолоти автомобилӣ пурра пешбинӣ шудааанд. Аз Гурҷистон ба Тоҷикистон маҳсулоти ғизоӣ, доруворӣ, чӯбу тахта, таҷҳизоти барқӣ ва мебел ворид карда мешавад.

Хотиррасон мекунем, ки муносибатҳои дуҷониба байни Ҷумҳурии Тоҷикистон ва Ҷумҳурии Гурҷистон 4 августи соли 1994 барқарор шуданд. То соли 1991 ҳарду кишвар дар ҳайати Иттиҳоди Шӯравӣ шомил буданд. Имрӯз онҳо аъзои Созмони умумиҷаҳонии тиҷорат, Созмони Амният ва Ҳамкорӣ дар Аврупо, инчунин аъзои комилҳуқуқи Созмони Милали Муттаҳид мебошанд. Тоҷикистон ва Гурҷистон иштирокчии барномаи TRACECA («Роҳи нави абрешим») мебошанд, ки ба рушди долони нақлиётии Аврупо-Қафқоз-Осиё нигаронида шудааст. Дар чаҳорчӯбаи барнома ҳамлу нақли борҳо байни кишварҳо фаъолона сурат мегирад. Фосила байни ду кишвар 2356 км -ро ташкил медиҳад.

Ёдовар мешавем, ки моҳи феврали соли равон вазоратҳои корҳои хориҷии Тоҷикистон ва Гурҷистон аввалин машваратҳои сиёсиро дар шакли конфронси видеоӣ баргузор карданд ва дар рафти он ҷонибҳо вазъи кунунӣ ва дурнамои рушди муносибатҳоро байни ду кишвар дар соҳаҳои сиёсӣ, тиҷоратӣ — иқтисодӣ, фарҳангӣ ва гуманитарӣ баррасӣ карданд. Инчунин иштирокчиён оид ба масоили амнияти минтақавӣ ва ҳамкории кишварҳо дар доираи созмонҳои байналмилалӣ табодули афкор намуданд.

Дар фарҷоми машваратҳои сиёсӣ, вазирони корҳои хориҷии Тоҷикистон ва Гурҷистон Сироҷиддин Муҳриддин ва Давид Залкалиани барномаи ҳамкорӣ байни ВКХ барои солҳои 2021-2022-ро имзо карданд.

АКС:  Вазорати иқтисоди Гурҷистон

Апрель 15, 2021 14:05

Хабарҳои дигари ин бахш

Вакилони гурҷӣ бо кормандони ҷавони низоми хизмати дипломатии Тоҷикистон мулоқот намуданд
Шараф Шерализода бо муовини котиби давлатии Котиботи давлатии Швейтсария оид ба молияи байналмилалӣ мулоқот намуд
Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд