ДУШАНБЕ, 31.05.2021 /АМИТ «Ховар»/. Дар Донишгоҳи давлатии Данғара дар  мавзӯи «Хатару паёмадҳои коррупсия» семинари омӯзишӣ  баргузор шуд, ки дар он кормандони Раёсати Агентии назорати давлатии молиявӣ ва мубориза бо коррупсия дар  вилояти Хатлон, майори адлия Парвиз Одинамаҳмадзода ва лейтенанти калони адлия Манучеҳр Қурбонзода   иштирок намуда, мавзӯи мавриди назарро шарҳ доданд. Дар ин хусус ёвари ректор ва мудири бахши  робита бо фазои иттилоотии Донишгоҳи давлатии Данғара Муҳаммад  Шораҳимзода ба АМИТ «Ховар» хабар дод.

Кормандони Раёсати Агентии назорати давлатии молиявӣ ва мубориза бо коррупсия дар  вилояти Хатлон иброз доштанд, ки  коррупсия — амали номатлуби шахс буда,  муқовимат бо он, пешгирӣ, ошкор кардан, кушодан, таҳқиқу тафтиши ҳуқуқвайронкуниҳои ба коррупсия алоқаманд ва ба ҷавобгарӣ кашидани субъектҳои ҳуқуқвайронкунии ба коррупсия рабтдошта вазифаи ҷонии ҳар шарҳванди ватандӯсти кишвар маҳсуб меёбад.

Номбурдагон ҳамчунин  таъкид карданд, ки коррупсия яке аз зуҳуроти хавфноки ҷомеа буда, дар миқёси ҷаҳонӣ ҳамчун ҷинояти вазнин ва яке аз унсурҳои таҳдидкунанда ба амнияти миллии як қатор давлатҳо ва халалдоркунандаи рушду суботи иҷтимоию иқтисодии онҳо эътироф гаштааст.

Дар ҷараёни семинар ҳамчунин зикр шуд, ки рӯзмарра ва мубрам будани масъалаи баррасишавандаро ба инобат гирифта, Ҷумҳурии Тоҷикистон иштирокчии фаъоли раванди ҷаҳонии муқовимат ба коррупсия гардид ва дар сатҳи миллию байналмилалӣ чораҳои дахлдори ташкилию ҳуқуқиро андешид. Дар сатҳи байналмилалӣ яке аз ҳуҷҷатҳои асосӣ ва муҳими ҳуқуқӣ, ин аз ҷониби Ҷумҳурии Тоҷикистон  25 сентябри соли 2006 ба имзо расонидани Конвенсияи Созмони Милали Муттаҳид бар зидди коррупсия ба шумор меравад.

Ректори Донишгоҳи давлатии Данғара,  профессор Нуралӣ Шоҳиён  зикр кард,  ки Раёсати донишгоҳ ҷиҳати муқовимат бо коррупсия нақша-чорабиниҳоро таҳия намуда, вобаста ба ин самт дар мавзӯъҳои алоҳида корҳои тарбиявӣ  гузаронида мешавад.

-Инчунин баҳри пешгирӣ аз ин амали наматлуб соли 2017 дар донишгоҳ Ассотсиатсияи “Ҷавонон бидуни коррупсия” таъсис ёфт, ки донишҷӯёни ҳамаи зинаи таҳсилот ва ихтиссосу равияҳо аъзои он   мебошанд, -афзуд Нуралӣ Шоҳиён.

Зикр  гардид, ки Ҷумҳурии Тоҷикистон иштирокчии муҳимтарин конвенсияҳо ва ниҳодҳои байналмилалӣ дар соҳаи мубориза бо коррупсия буда, таҳияи  санадҳои мубориза бо коррупсияро дар сатҳи давлатӣ ба роҳ мондаааст. Аз ҷумла бо ибтикори Пешвои миллат ду маротиба Стратегияи муқовимат ба коррупсия дар Ҷумҳурии Тоҷикистон қабул гардид. Ҳуҷчатҳои зикршуда аз он шаҳодат медиҳанд, ки давлат баҳри амалӣ намудани мубориза бо коррупсия сиёсати давлатии зиддикоррупсиониро роҳандозӣ карда, баҳри татбиқи он дар ҷомеа тадбирҳо меандешад ва дар ин самт алакай  ба дастовардҳо низ ноил гардидааст.