Дар шаҳраки Ваҳдати ноҳияи Шуғнон даври дуюми озмуни «Мо бо шумоем» баргузор шуд

ХОРУҒ, 15.05.2021 /АМИТ «Ховар»/. Дар маркази ноҳияи Шуғнон-шаҳраки Ваҳдати Вилояти Мухтори Кӯҳистони Бадахшон  даври ниҳоии озмуни «Мо бо шумоем» баргузор гардид. Ин озмун бо иқдоми Кумитаи иҷроияи Ҳизби Халқии Демократии Тоҷикистон роҳандозӣ шуда, дар он сарояндагону навозандагон ва раққосони аз 6 то 18-сола, ки маъюб мебошанд, ширкат варзиданд.

Тавре ба мухбири минтақавии АМИТ «Ховар» муовини раиси Кумитаи иҷроияи Ҳизби Халқии Демократии Тоҷикистон Зунайда Раҷабова иттилоъ дод, «озмун бо мақсади татбиқи ҳадафҳои инсондӯстонаву фарҳангпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти дастгирии қишри осебпазир ва ниёзманди ҷомеа ва ҳарчӣ бештар ҷалб намудани онҳо ба барномаҳои гуногуни таълимӣ, фарҳангию фароғатӣ мебошад. Аз аъзои қаторӣ то раҳбарияти ҲХДТ ҳамеша кӯшиш мекунанд, ки ягон нафар аз шахсони имконияташон маҳдуд, бахусус кӯдакону наврасон худро дар ҷомеа танҳо эҳсос накунанд. Ҳоло аксари онҳо дар баробари дигар ҳамсолонашон дар муассисаҳои таълимии маъмулӣ ва махсус ба таълиму тарбия фаро гирифта шудаанд ва равоншиносону табибон мудом аз ҳолашон хабар гирифта, ба волидон барои беҳсозии вазъи саломатиашон маслиҳату тавсияҳо медиҳанд. Озмуни «Мо бо шумоем» низ ба боло бурдани рӯҳияи кӯдакону наврасони имконияташ маҳдуд хеле кумак мерасонад ва инро мо имрӯз бо чашми худ дидем, ки ҳунармандони наврас чӣ  рӯи саҳна, чӣ берун аз он болидахотир ба назар мерасиданд ва ҳардам ба волидони худ табассуми ширин ҳадя мекарданд. Ба ин маънӣ, ки мо аз дигар ҳамсолонамон ҳеҷ фарқе надорем».

Дар озмун 20 нафар довталабон аз деҳоти мухталифи ноҳия ширкат варзида, маҳорату истеъдоди суханварию қироати шеър, навохтани асбоби мусиқӣ ва сурудхониро ба ҳайати ҳакамону тамошобинони сершумор намоиш доданд. Аҳли толор аз ҳунари онҳо ба ваҷд омода, борҳо ба по хеста, барояшон кафкӯбӣ намуданд.

Се нафар ғолибони озмун ба даври вилоятӣ роҳхат гирифтанд. Ҳизби Халқии Демократии Тоҷикистон ва мақомоти иҷроияи ҳокимияти давлатии ноҳияи Шуғнон ба ҳамаи иштирокчиёни озмун туҳфаҳои хотиравӣ тақдим намуданд.