Дар вилояти Суғд маъракаи ҷамъоварии ҳосили пилла оғоз ёфт

ХУҶАНД, 17.05.2021. /АМИТ Ховар/.  14 май кирмакпарварони шаҳри Конибодом дар миқёси вилояти Суғд аввалин шуда, супоридани пилларо ба нуқтаҳои қабул шурӯъ намуданд. Дар рӯзи нахустин ба нуқтаҳои қабул қариб 4 тонна пиллаи хушсифат ворид гардид.

Тавре  масъулини идораи “Пилла”-и вилояти Суғд ба хабарнигори минтақавии АМИТ «Ховар» Абдуаҳад Шарифзода иттилоъ доданд, дар ноҳияҳои манотиқи вилояти Суғд маъракаи ҷамъоварии ҳосили пилла оғоз гардид. Соли равон кирмакпарварони вилоят азм доранд, ки бо риояи ҳамаи қоидаҳои агротехникии парвариш ва нигоҳубини кирмак ҳосили хуб ба даст оварда, дурнаморо сари вақт иҷро намоянд.
Дар ҷараёни пилласупорӣ роҳбарияти шаҳри Конибодом, намояндаи идораи “Пилла”-и вилоят ва ширкатҳои сармоягузор иштирок намуда, ба кирмакпарварони пешқадам туҳфаҳои хотиравӣ тақдим намуданд.

Дар мавсими имсола кирмакпарварони шаҳр дар ҳудуди ҳамаи 6 ҷамоати деҳот бо риояи қоидаҳои агротехникӣ парвариши 1160 қуттӣ тухмии кирмакро ба роҳ монда, азм доранд дар муҳлатҳои муайяншуда аз иҷрои нақшаи пилласупорӣ мужда расонанд.

АКС: аз муаллиф