Даври аввали Озмуни ҷумҳуриявии «Тоҷикистон – Ватани азизи ман» дар шаҳру ноҳияҳои вилояти Суғд оғоз гардид

ДУШАНБЕ, 12.05.2021 /АМИТ «Ховар»/. Имрӯз дар 18 шаҳру ноҳияҳои вилояти Суғд даври аввали Озмуни ҷумҳуриявии «Тоҷикистон – Ватани азизи ман» оғоз мегардад. Дар ин бора сардори Раёсати фарҳанги вилояти Суғд Бахтиёр Қосимов ба хабарнигори АМИТ «Ховар» иттилоъ дод.

Мавсуф зикр намуд, ки баргузории озмуни мазкур тибқи Низомнома ҷараён гирифта, ҳайати ҳакамон аз масъулони бахши фарҳанг ва фарҳангшиносони вилояту ноҳияҳо иборат мебошад. Теъдоди иштирокчиён пурра муайян нагардидааст, зеро номнависии довталабон рӯз то рӯз бештар мешавад. Танҳо ҳаминро метавон гуфт, ки шумораи иштирокдорон нисбат ба соли гузашта бештар мебошад.

Ҳамчунин зикр намуд, ки дар озмуни имсола аз рӯйи раддабандии синнусолӣ (барои иштирокчиёни гурӯҳи касбӣ) ба таври зайл тақсим гардидааст:  аз 12 то 17- сола ва   аз 18 то 40-сола. Аз ин рӯ ҳайати  ҳакамон низ ба ду гурӯҳ ҷудо гардидаанд.

Бояд гуфт, ки даври аввали озмуни мазкур аз 17 май дар 25 шаҳру ноҳияҳои вилояти Хатлон ва аз 20 май дар 13 шаҳру минтақаи Бадахшон оғоз мегардад.

Тавре дар Низомномаи озмун омадааст:

«Озмуни мазкур дар се давр гузаронида мешавад:

— даври якум — моҳи  май-июни соли 2021 дар маркази шаҳру ноҳияҳо;

— даври дуюм — моҳи июл – нимаи аввали моҳи августи соли 2021 дар марказҳои Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе, шаҳри Ҳисор ва ноҳияи Рашт;

— даври сеюм — то 16 ноябри соли 2021 дар шаҳри Душанбе баргузор гардида, бо супоридани ҷоизаву дипломҳо ҷамъбаст мешавад».

Ёдовар мешавем, ки корҳои ташкилӣ барои баргузор кардани даври якум ва дуюми озмун ба зиммаи мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе, шаҳри Ҳисор ва ноҳияи Рашт вогузор гардидааст.