Мӯди баланди Тоҷикистон Дубайро мафтун мекунад

ДУШАНБЕ, 22.05.2021 /АМИТ «Ховар»/. Тамғаҳои мӯди Тоҷикистон дар Намоишгоҳи байналмилалии «ART meets FASHION», ки 20-23 май дар АМА баргузор мешавад, ширкат меварзанд. Дар байни намояндагони Ҷумҳурии Тоҷикистон муассиси бренди ZHIWJ Нафиса Имронова низ ҳаст. Вай тавонист бо дастгирии ширкати «МегаФон Тоҷикистон» ба Дубай сафар кунад.

«ART meets FASHION» якҷоя якчанд ҳафтаи мӯдро муттаҳид намудааст — Tajikistan Fashion Week, Kazakhstan Fashion Week, Azerbaijan Fashion Week ва инчунин Oriental Fashion Show.

Бори аввал брендҳои Тоҷикистон ба ин намоиши байналмилалӣ ҳамроҳ шуда, коллексияҳои нав намоиш медиҳанд. Бисёре аз онҳо таҳти таъсири анъанаҳои мардуми тоҷик офарида шудаанд. Ҳамин тавр, либосҳои дарози услубӣ ва ҷомаҳои беостини Нафиса Имронова бо рангҳои шинохта ва нақшҳои миллии худ фарқ мекунанд.

«Соли дуюм аст, ки ман имкон дорам орзуи худ — бо фарҳанги бойи тоҷикон шинос намудани олами мӯдро ба анҷом расонам. Соли 2020 бо шарофати дастгирии «МегаФон Тоҷикистон» коллексияии маро дар Париж ва ҳоло — дар Дубай тамошо карданд. Боварӣ дорам, ки «сабки тоҷикӣ» дар тамоми ҷаҳон боз ҳам маъмултар хоҳад гашт!»- мегӯяд Нафиса Имронова.

«Анъанаи ширкати мо- дастгирии варзишгарон, навозандагон, тарроҳони боистеъдоди Тоҷикистон аст. Фаъолияти онҳо на танҳо анъанаҳои беҳтарини миллиро идома медиҳад, балки «робитаи мустаҳками» байни халқҳо мегардад. Танҳо ба либосҳои аҷиби Нафиса назар андозед: онҳо чунон зебоанд, ки занони тамоми қораҳо мехоҳанд онҳоро дар бари худ дошта бошанд! Хеле гуворо хоҳад буд, агар мӯди тоҷикӣ оғози шиносоии наздики сокинони кишварҳои дигар бо ҷумҳурии мо шавад», — мегӯяд Валентина Бутник, PR Директори «МегаФон Тоҷикистон».

                                           АКС аз манбаъҳои боз