Машваратҳои сиёсии Тоҷикистон ва Покистон дар шакли видеоконференсия доир шуданд

ДУШАНБЕ, 26.05.2021 /АМИТ «Ховар»/. 25 май даври панҷуми машваратҳои сиёсӣ миёни вазоратҳои корҳои хориҷии Ҷумҳурии Тоҷикистон ва Ҷумҳурии Исломии Покистон дар шакли видеоконференсия баргузор гардиданд.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, ҳайати Тоҷикистонро муовини якуми Вазири корҳои хориҷӣ Хусрав Нозирӣ ва ҳайати покистониро муовини якуми вазири корҳои хориҷии он кишвар Суҳайл Маҳмуд роҳбарӣ намуданд.

Дар ҷараёни ройзаниҳо доираи васеи масъалаҳои муносибатҳои дуҷонибаи Тоҷикистон ва Покистон дар арсаҳои сиёсӣ, ҳамкории парламентӣ, пояи қарордодию ҳуқуқӣ, иқтисоду тиҷорат, амнияту дифоъ, маорифу фарҳанг ва ғайра баррасӣ шуданд. Гузашта аз ин, ҷонибҳо пиромуни ҳамкории ду кишвар дар чаҳорчӯби созмонҳои байналмилалӣ ва минтақавӣ, аз қабили Созмони Милали Муттаҳид, Созмони ҳамкории иқтисодӣ, Созмони ҳамкории исломӣ, Созмони ҳамкории Шанхай, амнияти минтақавӣ, мубориза бо терроризм ва қочоқи маводи мухаддир табодули афкор карданд.

Ҷонибҳо бо изҳори қаноатмандӣ аз сатҳи ҳамкории ду кишвар омодагии худро бобати густариши бештари муносибатҳои дуҷонибаи Тоҷикистон ва Покистон дар ҳамаи заминаҳо дар рӯҳияи дӯстӣ ва ҳусни тафоҳум таъйид карданд.

АКС аз ВКХ ҶТ