Мулоқоти дуюми вазирони корҳои хориҷӣ дар чаҳорчӯбаи «Осиёи Марказӣ ва Чин» дар шаҳри Сиан баргузор шуд

ДУШАНБЕ, 12.05.2021 /АМИТ «Ховар»/. Бо ибтикори ҷониби Чин 12 май дар шаҳри Сиан (ҶМЧ) мулоқоти дуюми вазирон дар чаҳорчӯбаи  «Осиёи Марказӣ — Чин» баргузор шуд. Вазирони корҳои хориҷӣ дар мавриди ҳамкорӣ дар самти мубориза бо пандемияи COVID-19, барқарорсозии иқтисодиёт, дастгирӣ кардани амнияти минтақавӣ ва густариши ҳамкории байналмилалӣ мубодилаи афкор карданд. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

Роҳбари Вазорати корҳои хориҷии Тоҷикистон Сироҷиддин Муҳриддин зикр кард, ки дар пасманзари густариши уфунати  коронавируси нав ҷомеаи ҷаҳонӣ ба мушкилоти ҷиддии иқтисодӣ ва иҷтимоӣ дучор шуд. Шароити бамиёномада зарурати қабули чораҳои муассиртарро дар чаҳорчӯбаи «Осиёи Марказӣ ва Чин» ҷиҳати вокуниши муштарак ба пайомадҳои башарӣ ва иҷтимоӣ — иқтисодии пандемия тақозо мекунад.

Сироҷиддин Муҳриддин давлатҳои иштирокчии механизмро ба  иттиҳод дар мубориза бо пайомадҳои пандемия аз тариқи истифодаи тамоми захираҳо ва имконоти мавҷуда даъват кард.

Вазирони корҳои хориҷии кишварҳои Осиёи Марказӣ ба Ҳукумати Чин барои кумаки саривақтӣ дар мубориза бо COVID-19 изҳори миннатдорӣ намуда, инчунин омодагии худро барои якҷоя комилан маҳв кардани сирояти коронавирус дар Чин ва Осиёи Марказӣ тасдиқ карданд.

Сироҷиддин Муҳриддин ба масъалаҳои рушди минбаъдаи ҳамкории минтақавӣ дахл карда, зикр намуд, ки ҳамкорӣ дар соҳаҳои сармоягузорӣ, энергетика, саноат ва кишоварзӣ, инчунин дар соҳаи нақлиёт ва коммуникатсия бояд густариш дода шаванд.

Ҷонибҳо аҳамияти ҳамкории кишварҳои минтақаро дар соҳаи амният таъкид ва зикр карданд, ки барои сулҳу суботи устувор дар Афғонистон, ки омили асосии таъмини амният дар минтақа мебошад, бояд ба масъалаҳои иҷтимоӣ ва барқарорсозии иқтисодии ин кишвар афзалият дода шавад.

Дар фароварди мулоқот, вазирони корҳои хориҷӣ Изҳороти муштараки ҷаласаи дуввуми вазирони корҳои хориҷии «Осиёи Марказӣ ва Чин» дар бораи таҳкими минбаъдаи ҳамкории байниминтақавӣ, Ёддошти тафоҳум дар бораи таъсиси чаҳорчӯбаи вохӯриҳои вазирони корҳои хориҷии «Осиёи Марказӣ — Чин», Изҳороти муштараки ҷаласаи дуввуми вазирон «Осиёи Марказӣ ва Чин» дар бораи ҳамкорӣ дар мубориза бо COVID-19 ва Изҳороти муштараки вазирони корҳои хориҷии «Осиёи Марказӣ ва Чин» -ро оид ба Афғонистон қабул карданд.

ДАР АКСҲО: лаҳзаҳо аз China Global Television Network (CGTN)/ ВКХ ҶТ